जोड घटाउ मिलाऊँ भन्छु मिलाउनै सकिएन
आफ्नो भाग्य सिलाऊँ भन्छु सिलाउँनै सकिएन ।
देशै भरी सीमानामा खाडलहरु परिसके
खाल्डाखुल्डी मिलाऊँ भन्छु मिलाउनै सकिएन ।
खेर गयो देशबाट सञ्जीवनी सुधा बगी
एक थोपो पिलाऊँ भन्छु पिलाउनै सकिएन ।
जतासुकै रोग व्याधी चारैतिर बढेको छ
देशको ढाड चिलाऊँ भन्छु चिलाउनै सकिएन ।
तीन चौथाई जिन्दगी यो यसै उसै बितिसक्यो
यो माटैमा बिलाऊँ भन्छु बिलाउनै सकिएन ।
समाप्त