जीवनको अर्थ

बलेंसीमा खसेको जूनको उज्यालो
आँगनको डिलमा फुलेको फुल
मझेरीमा मधुरो प्रकाश छरेर बलेको दियो
प्रेमिकाको मनहरू पोखिएर
भरिएका पुराना चिट्ठीका चाङहरू
चाहेर पनि
कहिल्यै बन्न नसकेका
हाम्रा गहिरा नाताहरू
अनि,बिपना नभई झरेका
सपनाका चाङहरू
चराहरूले जस्तै गाउने
गीतका अन्जान धुनहरू
र,सँगसँगै भएर पनि
कहिल्यै फेला नपर्ने गरी
हराएका मायाहरू
तिमी र म यस्तै यस्तै चक्रब्यूहमा
जीवनको अर्थ खोजिरहेछौं।