लेकबाट सँगै बेँसी झर्न पाए हुन्थ्यो
उनकै घरछेउमा डेरा सर्न पाए हुन्थ्यो।
के गर्नु र चिनाजानी भाकै छैन हाम्रो
के छ विचार आदान–प्रदान गर्न पाए हुन्थ्यो।
गमलाको फूलजस्ती मेरी मायालुलाई
हात समाई तौधीखोला तर्न पाए हुन्थ्यो।
मनभरि थुप्रै रहर उर्लिएको देख्दा
एकान्तमा केही कुरा गर्न पाए हुन्थ्यो।
के छ र यो जिन्दगीमा मरी लानु हेर
बाँचुन्जेल हाँसखेल गर्दै मर्न पाए हुन्थ्यो।