यहाँ जिन्दगीले कहाँ बास पायो
जहाँ आस आ'थ्यो त्यहाँ चोट छायो
दुखेकै छ छाती जहाँ घाउ पाक्यो
म फुल्ने बगैंचा जहाँ दुख बाँच्यो

भरें आँसु धेरै पुछिनौ तिमीले
कराएँ गुहारें सुनिनौ तिमीले
म ढल्दा तिमीले उठायौ कहाँ र
म डर्दैछु आगो निभायौ कहाँ र

म सोच्थें हुनेछौ तिमी नै बिहानी
नयाँ जिन्दगीको सुनौला कहानी
तिमी मै थियो आस इच्छा उमंग
तिमी नै थियौ प्रेमको सप्तरंग

शब्द - रबि राज भण्डारी
स्वर, संगीत - भक्तराज आचार्य
एल्बम - हजार सपना