शान्ति तिम्रो आँगनमा अमृत जल छरेकी छु
तिम्रै स्वागत गर्छु भनी कलशहरू भरेकी छु
तिम्रो साथ पाउन मैले पीडाभित्र जिउनुपर्यो
धेरै पटक बाधा अड्चन अप्ठ्यारोमा परेकी छु ।
जीवनको गोरेटोमा ठक्कर खाँदै यात्रा गर्दा
तिम्रै निम्ति सङ्घर्षका जङ्घारहरू तरेकी छु ।
जीवन यो राजीखुसी चढाएर तिमीलाई
युगौँसम्म तिम्रो साथ पाउने प्रयास गरेकी छु ।
अन्याय र अत्याचारको विरोध गर्छे ‘जिज्ञासु’ले
नयाँ केही गर्नलाई तिम्रै गाउँमा सरेकी छु ।
– सरस्वती शर्मा ‘जिज्ञासु’
कुश्मा, पर्वत