तिनी झुमा रे । दिम ख्लासि अरब खाबा नोन न्हिदिङ छ्योदाम्जिम । सनैयाला ३० नम्बर क्यामरि चिबा नोन ओतेन दुई ताजिम । मुबाला अरबला ग्यु थेन उट छाबारि खाबा क्योङसेन गे ख्लाजिम । ङा नेपालग्याम दोखामा म्हेन्दोगिक इन्डोनेसियन जेकेन मुबा । दान्देमि मजरारि गेलाबा लेबरकादे ल्हानान मुला ।
आले एजा खाइमा खाबा ? नेपालला ठेगाना जा खानाङ ? सन्ते माझिसे सार्कि तामाङदा ङ्योइजि । झुमा कुनु हिन्दूकादेशे सल्लि आलासाइ ताबाका । खाऊ दुख सुखला ल्हेङमोलाई आले बिसि सार्कि तामाङदा पाङबान मुबा । ताला म्हाले आज्यो । ङामि परदेशला ग्ला । छाङमानोन छारछार छोर्जि । अरबि ग्योइएन आगोबाका । तिल्मा जेकेन नेपालग्याम दोखाबा । ङादाएन चुरिन गेलाउ बिसि पुइखाबा हाउ आज्यो । ङाला दिम सिन्धुपाल्चोक हिन्ना ।
ए हिन्ना आले । ओराङ हिन्सामि ल्हानान ज्याबा ताजि । ङाएन चु अरबि मुदिरलारि गेलाबा गिक्खेन मुबा । ह्रो ताबासे ताजि । लु आले ह्याङ म्हेन्दो न्हिसेन डिक्सि गे लातोला । तिनी मि छुट्टि मुला । तिनी सुक्रबार झुमा हिन्ना । न्याम्से हिन्से गे लातोला । सन्ते माझिसे सार्कि तामाङदा पाङजि ।
ए ताला नि आज्यो । ङामि छार हिन्ना । आज्योसे गे लोप्सि पिन्दोला । डिक्सीमाम गे लातोला । सार्कि तामाङदा म्हिह्युलरि एन नेपाली आज्यो ह्रुप तामा सेमन्हाङरिन ताङजि । गे जा उट छाबा गे ।
नेपालरि ओदेशारो गे आलाबा सार्किदा गेरि ओदोसारो सेम आनिसाइ बाध्यतासे लानोन तोजि । नाम्सारि एसएलसि लिच्छा बेरोजगार दोबासे अरब निबाला सार्किसे ङ्होरि मुसाका बोरि थोप्से बिसि गोठालो गेरि वाङजि । तिनीन्हाङगार लाना लानान दिमथेमे ख्लासि अरबरि खबाएन लासोम छ्योजिम । ४५ डिग्रिला दिनिरि ग्यु छासि ङ्यासे क्यामरि म्हेर्गे लाबा दुइरि म्यासेन्जररि म्यासेज खाजि । मोबाइलरि म्यासेज खाबा चिम । फेतछोर्जि । वाइफाइ अन लानाज्ञानान टुनूनु म्यासेजला ओइरो ताजि । सोमरे ताबा मुबा थेसे वाइफाइ अन आलाबा ।
म्यासेन्जररि म्यासेज दिमथेमेसे पुइगाबा टिम । थेलान ल्हुइहे । ल्हुइह्रो डोल्मोला म्यासेजसे सार्किला सेम क्युङजि । खेप्पा खुयु दोबा आपा आमाला करसे क्याम्साङ दिमला डोल्मोदा तिक्युङमा जेकेन ब्यहाँ लाबा मुबा । आपा आमा ताङजि । चाङछार बाबा दुइहेन्से दिम ह्यालह्याल दोजि । थेसे एसएलसि ङ्हाच्छा डोबारि आर्थिक समस्या ताजि । डोबारि आम्याङनि । नाम्सादिमरि गेदोइ आयाङबासे अरबला छेप्पारि ब्राबा मुबा ।
ह्राङदा खाराङबा मुला । चिठिपत्र आँखाबाएन लासोम ताजि । आपा आमासे डान्सि चिमुला । ङान्दाम ज्याबाखाम्बान मुला । आपा आमा आस्याङ आङि छाङमानदा ज्याबाखाम्बा मुला । मुबामि चुरि छाङमान मुला । तासाइ तिगा आरे तिगा आरे ? बिबामि ङाला तिङह्रो जा छ्यामरि आरे । तिगालासे चु छ्योपछ्योप्पा बैसालु ल्हुइसे ह्राङदा डान्सि चिमुला ।
चु बेरोजगारि थेन प्राङबोला से ह्याङदा फेना लाजि । प्रेनोन डोबाला ह्रोजुगु फिरफिर स्यासि ब्रामुला । क्याम्साङ डोबारि याम्बुरि निबा मुला । थेनिला ल्हुइदा मास्ति मुला । तिगा लासे ह्याङलामि दिमथेमेला आर्थिक च्याङना ताबासे तिगाइ लाबारि आँखाम्नि । दारेम ङाएन तिगाइ सिप लोप्तोजि । ओन्मा जेकेन महिला विकाससे क्वान डुप्पा थेन ब्युटिपार्लर तालिम सूचना तेबाला मुला । ङाएन सहररि निसि लोप्तोजि ।
सार्किसे डोल्मोला म्यासेज डोजि । न्हिरेम डोजि । थेदाएन डोल्मोला ताम ज्याबान छोर्जि । आलाउ बिसि बिबारिएन आँखाम्नि । सिप लोप्सि आत्मानिर्भर दोबारि आँखाम्बासे लासि ङा चुरि म्हिला ह्युलरि गोठालो दोतोजि । कर्मला ताम तिगा लासे सिप लोप्पा हिन्सामि नाम्सारिन आपा आमा थेन दिम थेमेरि ताङसि चिम्याङसेला । ह्राङसेम दुङाल याङजि बिसि जेकेन आता । थेसे सेमसेम नोन डान्जि । म्यासेन्जर च्याना च्यानान डोल्मोएन अनलाइन खाजि । डोल्मोदा सार्किसे तालिम लोप्पारि अनुमति पिन्जि । तिगा लासे परदेशिला ल्हुइ तिग्लो ल्हुइ थेन समेह्रो तिग्लो । गरिबेसे ग्लागिरी चिबारि आपिन्जि । फेसबुक मेसेन्जर थेन इमोरि छ्योपछ्योप्पा बैंस जुसि चितोबा टिम । ‘तिर्खामा नपाएको मोइ र बैंसमा नपाएका पोइ’ विवाह्राङ तातोजि । डोल्मोसे सर्किदा उतर दोजि । भिडियो कल लासि एसे ङादा स्हिगो ङाइ एदा स्हिला बिसि डोल्मोला उतर खाजि । सार्किसे भिडियो कल लासि डोल्मो थेनाम लाजि । च्यागो ‘क्याम्साङ ब्लेरि बात खेबा तिग्युङ च्यासाइ ओत्थेबा, तिनी च्यासाइ ओत्थेबा’ बिसि ह्रेम्बोला सेम क्योइसि ङोबान डोल्मोसे पाङजि । सार्किएन तिगादा च्याङना । सेमला बेइ खाना खाना म्रिङ ह्रेम्बोला गुङरि ताबा आताबा सेम छुना ताम लाजि । थेकुनुला भिडियो कल लिच्छा न्हाङगार दाङसेन डोल्मो तालिमरि सहर ब्राजी । तिगा लासे खेप्पा खुयु केनस्युमिसे कासि काबारि आतानि । चाङसे यारि सिप मुसाम सुख याङबा डान्सि सहर पुइजि ।
सिलाई थेन पार्लर तालिम लिच्छा तालिम पिन्बा गेन्दुनसे व्यवसायि लाबारि पिन्बा लाख गिक टाङगासे डोल्मोसे पसल जुजि । डोल्मोएन ताङजि । सार्कि तामाङएन ताङजि । पार्लरला व्यवसायिक सफलता लिच्छा डोल्मो ब्यस्त ताबारि चुजि । तिनी न्हाङगार लाना लाना डोल्मोसे नाम्सा ख्लाजि । निबारि सुतान ख्लाजि । सतान अनलाइन तासाइ च्याङना जेकेन सार्किथेन ताम लाबारि वाङजि । बिजि मुला गे मारामार मुला बिसि पाङमुबा । ह्रेम्बोएन दिकगि मुदिरला ग्यु छासि लखतरान ताबासे छुप म्हेर्मुबा । म्हाङरि सुताइ ह्रुप ताबारि आम्याङबा ताजि । दिमनाम लाबाला जा चाङला आपा आमासे ओदेशारो निदिखोजी आलाबा मुबा । कि ङादा थाहा मुला कि लादा थाहा मुला बिसि खाजीवाइ आप्ठ्यारोरिएन दिमनाम स्होसि चाबा सार्कि तामाङसे डान्बा मुबा । चुनोन ल्हुइह्रोसेएन ह्रो लाला बिबा म्हान्बा मुबा । डिहिला म्हेन्दो आसारनान साम्बाह्राङ ताजि । थेसे ओराङबा दुङाल नातोला बिसि म्हाङरि सुताइ आडान्मुबा । आतागाइ बिबा घटनासे थेदा बोल्जि । थेला लानिह्राङ लासि ह्याल ह्याल्बा दिमथेमेरि दोपदोपबा खासुसे गाप्चि । हिन्बामि थे बिदेशरि मुबा दुइरिन क्याम्साङ जासामला ह्रोकादेशे बिदेशिला म्रिङकादेला धोकाला बारेरि बर्नन लामा थेदाइनोन विश्वास आतामुबा । ङाला दिमरि ओराङबा अवस्था आरे बिसि पाङमुबा । तिरे न्हिरे लामा परदेशिला बिरक्तसे लासि दिमख्लासि ब्राबा म्हिला बारेरि नोन थेसे गाइगुइ थेबा मुबा । तासाइ थेदा विश्वास आतामुबा । डोल्मोला बारेरि नोन जागारगिमि थेबा हिन्ना तासाइ ओतेल्हाना विश्वास लाबा म्हिसे खाराङ लासि धोका पिन्बा बिसि थेदा आम्हान्नि । ह्राङसेन विश्वास लाबा म्हिसे ओथेबा धोका पिन्ना बिसि खाल्से पाङला ? सेमसे सेमरिन ताम क्लाङमुबा । स्यास्या खेरो न्हाङगु न्हाङगु खेरो बिबा ह्राङ ताजि विश्वास आलासाइ आताबा विश्वास लासाइ आताबा । म्हिल्हुइरि चुराङबान व्यवहारकादे ताबा टिम । अरबला छेप्पारि क्रोसिक्रोसि ह्रुप्पा टाङगाएन प्लुस निजि । दिमनामएन फुप्चि ।
दिङङ्हि छ्योबा लिच्छा सार्किला छुट्टि थोन्बासे दिमथेमेदा खबर पुइजि । खाप्पाइबिमा ल्हाना डोल्मो ताङजि । कतार एयरलाइन्सला पिलेनग्याम कतारसे खाबा सार्किे ताङसि ताङसि नाम्सारि दोजि ।
आपा आमा क्रासि चिमुबा । ङ्योइबाका था याङजि पार्लर चुङसि डोल्मो सहररि रिक्सा स्याङबा डाइबरतेनका ह्यार्जिम रो । नाम्साहेन्से सहरदोना डोल्मा ह्यार्बाला ताम लाबा लुङसुरतेन फ्याङसि निजि । खालाइसे ओन्छ्यान बिजि । खालाइसे बिसाम बेलारि बुद्धि आरेमाहेन्छे चुराङबान तामुला बिसि ताम थाजि ।
आर के जिम्बा ‘पूर्वेली’