यो परिवर्तनशील दुनियाँ र यहाँको रफ्तारमा
सुशङ्ख्य र दुरुभास गति यन्त्रले तिमीलाई परिवर्तन गरिदिएछ आज
तिम्रो त्यो खोज गर्ने बानी मारिदिएछ आज
तिम्रा ती तेजिला आँखामा कुनै पारदर्शी छेकबार
नलगाई देख्न छाडेछौ सामान्य दुरिका अक्षर
दुईहातका बुढी औलाले नै तिमी संसार देख्न थालेछौ
तर जसले संसार देखाइदियका थिए आज उनैलाई भुलेछौ

खै कसरी सक्छौ?

आमाले पिट्दा बाबासँग बाबाले पिट्दा आमासँग टासिन जाने तिमी
आज खै किन टाढिन लागेछौ,
त्यो देखावटी माया देखाई पुरानो फोटोमा किन रङ भरेछौ
को खाई-को खाई गर्दै हाम्म गराएका हातका औला
र निद्रामा पल्टिने हत्केलालाई आज कुरुप देख्न थालेछौ
समय अनुसार तिमी परिवर्तन भयौ होला
साझ बिहान भातसँग के तरकारी खानि आमा भन्दै
गुन्द्रुक, मस्यौरा खोज्न जाने तिमी
ब्रेकफास्ट, डिनर, लन्च फरक फरक रेस्टुराँमा अर्डर गर्न थालेछौ
हो तिमी धेरै बदलिएछौ समयसङ्गै कर्तव्यलाई नाघी
सोच बदलेछौ, आफ्नो रुप र व्यवहार बदलेछौ
तर थाहा छ कुनैदिन माफ गरिदिनुस आमा बुवा भन्दै रुनेछौ
कुरुप लाग्ने त्यो हात सुमसुमाउनेछौ,
पसिनाले भिजेको सर्टको गन्ध त्यही दिन मात्र तिमीलाई
बास्नादार परफ्युम लाग्नेछ, अनि त गला लाग्नेछौ
अनि मलाई लाग्नेछ तिमी फेरि बदलिएछौ ।