Skip to content

ख्रिन दोङरिन चिबा ख्रिनला ज्याबा धुन (निबन्ध)


स्कुलग्याम कलेज ल्हुइरि वाङमा हेन्से स्याप्जि– गंगा श्रेष्ठ, विजय श्रेष्ठ, विवश बस्ती, बासु क्षितिज, प्रोल्लास सिन्धुलीय । परिवेस साहित्य परिवारला मिनरि क्रियासिल मुबा थेनिकादे । आस्याङ स्वयम्बरसिंह लामाला सचेतनाग्याम वाम राजनीतिप्रति जाजा दिङरिन क्रियासिल ङादा प्रगतिसिल ग्योइकाइ तिला हिन्ना बिबा था नोन आरेबा । ग्ले रानिला जयगान ब्रिसि स्कुलग्याम आयोजित उत्सवजुगुरि पुरस्कार ताबा ङादा आस्याङ स्वयम्बरसिंहला भौतिक झापडसे प्राङबोला स्हु ब्रिबारि जेक्खे आलोप्नि । ‘एला श्रिपेज, ख्रेन्बाला आन्छाङ, नाकिला मे च्योच्यो’ बिबा व्हाइखा ब्रिबा दोनालाजि । चुराङबान व्हाइखाजुगु ब्रिबान पाङबान ब्राबा ताङरि तिरेकुनु प्रधानपन्चला न्हाब्याङए ङ्यान्खेन दोजि । थे ङ्यान्खेनला आर्कु पादलसे ङाला कलमसे न्हाबा न्हाजि । सेम खोबाग्याम अनन्त दुइला लागि न्हाबा किन्बा ङाला ग्योइकाइ सेमला शान्त ग्योइदा प्योना लाजि विवश बस्तीला ह्रुपसे ।

हवाइ स्योस्योला प्रचलन ङ्हाच्छा डेङ स्योस्योसे खुब बजार ह्योङबा मुबा । थे म्हाङ ङादाइ क्रेबा मुबा । खाइमागि ‘खोजि’ डेङ स्योस्यो तेजि । ङाइ आलुना पाङतोला विवशतेन ताबा ह्रुपसे थे डेङरि फ्लाक्बा ‘खोजि’ से छिपा स्योस्योला लि किन्जि । ब्लाप्बा न्हाबा ङाला ब्रिबा ल्हामसे नोन चुनोन ग्याम बेग किन्बारि चुजि । चुनोन गुङरि प्रोल्लास फेजि । बासु फेजि । फेजि विवश थेन सिन्धुलिरि लेङजि ङा जेक्खे । निरंकुस पंचायत लिच्छाला जाकि खुकुलो बहुदलीय ग्लेठिम परिवेस ह्राङलान तालरि छार्बाकेन मुबा । तिजि साम्यवादि म्हाङ थोबा माओवादि आन्दोलन । सिन्धुलिला मरिन स्योङला बाढि ह्राङ सर्लक्क उर्लब ताजि, थेरिक्यार चुर्ला ह्युल्बा । वाला फेटा खिबा, दिमदिमरि बंकर स्होसि तालिम किनचिबा डफ्फाजुगु स्हेङजि । प्रसासनिक थुम कानाकुनिरि दिनदाङसे घन्कव ताबा चुजि– मुर्दावाद थेन जिन्दावादला गगनभेदि नारा । ङा बिसाम चुथामा होकफेजि ओम ह्रुप ताबारि दोजि, वाम राजनीतिग्य आसेम वरिष्ठ प्रगतिवादि ग्योइकाइ ब्रिखेन आहुतितेन । ग्योइकाइरि बैचारिक कला, राजनीतिरि परिपक्वता थेनोन ग्याम किनम्याङजि ङाइ । आसेम, तिल्माला ङाला खोजी थेन परिवेस दुइला ह्रोजुगु डान्बारिक्यार जेक्खे दोजि । ङामग्याम्से घुलमिल आताबा ग्योइकाइ ह्रोजुगु क्यार मुथुम (क्षितिज) ह्राङ बुल्खु बुल्खु तासि चिजि ।

तिलाई दुई ङ्हाच्छा फेसबुक म्यासेन्जररि ‘यकिना जि’ बिसि सम्बोधन ख्लाबाला चिम । सम्बोधन लाबाला फेसबुक ङोसेबा मुबा– ‘जानुका अन्जान ।’ डान्बारि म्हाइजि, डान आँखाम्नि । फोटो च्याजि आसेनि ।

ङाइ ‘माफ पिन्स्ह्युगो आसेनि’ बिसि म्यासेज ख्लाजि ।

थेसे ‘जरुरी आरेमा ह्राङसे म्हाइस्हिमुबा । दाते आवश्यक ताजि ङाइ म्हाइजि ।’ दोसि जवाफ ब्रिसि ख्लाबाला चिम । ङाइ फेसबुक उति चलब आलामुला । सायद विकसित प्रविधितेन क्लाङबा बानी आतासे नोन हिन्ना ताला । थेलिच्छा चु म्यासेजए आच्यानि । तिलाई दिन जवाफ आयाङमा हेन्से थेसे ब्रिबाला चिम, ‘यु खाराङबा म्हि हिन्ना ।’ ‘ङा जानुका गुरुङ अन्जान ।’

क्योलोलो ङादा २२–२३ दिङ ङ्हाच्छाला खोजी थेन परिवेस दुइला ग्योइकाइ ह्रोजुगुला डान्बा खाजि । थे दुइरि दातेह्राङबा संचार सुविधा आरेमुबा । सदरमुकामला दूरसंचाररि मुबा आवा बिमा नाम्सारिक्यार द्रुत संचार आरेमुबा । मुबा मि केवल हुलाकग्याम पुइबा रजिष्टार लाबा चिठिपत्र जेक्खे । मोबाइल, फेसबुक थेन म्यासेन्जर मि म्हाङरिन आम्राङबा कल्पना माङग्यारला ताम मुबा । म्हि ङोसेबारिम कि त सदरमुकामरि मुस्किलसे स्याप्बा गि ङ्हि फोटो स्टुडियोरि च्योथान्बाला फोटो च्यातोबा तामुबा कि त म्हिनोन ह्रुप तातोमुबा । प्रविधिला चुराङबा असुविधायुक्त दुइरि ‘थेसे ज्याबा ब्रिमुला ।’ बिसि ङादा विवशसेन सिफारिस लामुबा, जानुकाला बारेरि । ङाइए नोन थेला तिलाई रचनाजुगु डोजिन्मुबा । थेताबासे म्हाइमुबा, ङाइ धुइपताल थेदा हुलाकला चिठिपत्रग्याम । दुर्भाग्य नोन बितोला तासाइ खाइमाइ ह्रुप ताबारि आँखाम्नि थेतेन । कि ङाइ म्लेजि था आरे ।

थेसेन सम्पर्कला लागि नम्बर ख्लाथान्बाला चिम । थे नम्बररि फोन डायल लाजि । फोनरि जवाफ खाजि– ह्राङसे डायल लाबा नम्बररि दाते सम्पर्क ताबारि आँखाम्नि ।

‘यु खाराङबा म्हि’ से ङादा चोदे झंक्रित पारप लाजि कि तिनी ङ्हिरे ताजि चु खबर च्यामा दिमाग बोरोरो ताचिमुला । म्हान्जि जानुकातेन स्याप्बारि जुरप आताबा नोन कलाकर्मीला मिरि परतिना परतिनान बाँसुरि स्होबारि आम्याङबा ख्रिन झ्याङरिन चिबा सुरिलो ज्याबा धुन बिमा च्याङनाला आनन्दित आरे ।

यकिना अगाध

Leave a Reply

Your email address will not be published. Required fields are marked *