मंसिरला दुई खाजिन्बा मुला । क्याम्साङला साजिला जासेमि चाङ बाजि रो होइ ङान्नाम जादामि कादे बिसाइ थेसागा ! ए एसे थेबान आरेम होइ साइलि ङान्ना क्याङबा आलेसेएन कादे पाङसाइ चुपाल्छेएन चाङ बालाह्राङ आरे । चुह्राङबान ताम ताना तानान ताम लाना लानान चाङ बाबा दिङ थाल्सि निजि । खाइ तिक्दा आङ्यान्बा । वादिरि म्हेन्दो ङ्हि जेठानि देउरानि ताम लाबारि चुजि । तिनी न्हाङगार नाम्सादिमरिक्यार चुह्राङबान ताम तामुला ।
खालाइदा जासे चाङ आबानिन बिबा दुङाल । खालाइदा जामे छार्जि । दिमनाम आताबा बिबाला दुङाल । तासाइ दुङाल । आतासाइ दुङाल । दङाल नोन दुङाल । चु जाज जमे मुसाइ पिरालो । आरेसाइ पिरालो । मुसाम जाजुबारि खाराङ लासि छार्ना लागे बिबा पिरालो । खेप्पा ताबा लिच्छा केवा पिन्सि जेकेन आताबा । कर्मएन लासि पिन्तोबा पिरालो । आपा आमाला सेम । मसाइ मायो । आरेसाइ मायो । आपा आमाला सेममि जा जामे न्होङगाइ बिसि खाइमाइ आताबा । खालाइला जासे खालाइला जामे जोर्सिन बातोबा । खालाइला जामेसे स्यान्दोला दिमरि निनोन तोबा । तिल्मा खाल्ला जा । खाल्ला जामे । आसेसाइ, आगोसाइ । दिमनाम लानोन तोबा । ह्युल्बाङसे स्हेङबा ठिमनोन हिन्ला । गिसेम गिदा हाप ख्वाइसि बानोन तोबा । गिसेम गिदा डुइसि तासाइ बानोन तोबा । आला बिसि आता । आनि बिसि आता ।
ह्युल्बाङला ठिमदा तेन्सि थान्तोबा । आपा आमासे बिबाइ ङ्यान्तोबा । आपा आमासे आङ्यान्साइ आताबा । लासाइ आताबा । आलासाइ आताबा । जामे छार्सा आपा आमादा पिरालो । जा छार्सिम आपा आमादा पिरालो । आपा आमासे जाजामे थेन ताम लासाइ ताबा । जाजा जामेसे आपा आमादा ताम लासाइ ताबा । ह्राङला लागिरी ल्हुइह्रो दाम्बारि ह्राङसेन दाम्साइ ताबा । स्ह्यान्दोसेन दाम्सि पिन्साइ ताबा । स्योन्दोसेन दाम्सि पिन्बासे दिमनाम ताबा वा आताबा वा ? आतासाम खाल्से दोस किन्बा ? खाल्दा दोस पिन्बा ? दोसिन सेम डिक्सि डिहिला म्हेन्दो फार्ना लासाइ । सेमला ताम जुसि चिसाइ । फुसि चिसाइ । डिक्सि चिसाइ । सिकसिक लासि छेसाइ । प्रोक प्रोक छेसाइ । टाङ टाङ टिङ टिङ ह्रुप्साइ ताला । काइरानरि ब्रिबा मुला । सेमह्रो म्हाइबा ह्राङसेन हिन्ला । म्राबाइ जोडि ह्राङ ख्युरुरु ब्रासि जेकेन आतानि । जाज जामे छार्ला । रा मे छार्ला । रा मे छासि जेकेन आतानि । आङिला जामे मुसाइ ताला । आरेसाइ ताला । आस्याङला जा मुसाइ ताला । आस्याङला जा आरेसाइ ताला । मुबासेम आस्याङला जामे ङाला छामे बिसाइ ताला । आरेबासे तिगा लाला ।
हिन्बामि छुररि ग्यवाइबाजी आइराक थुङसि म्योसाइ ताला । ङ्यासेला नामे थेन स्ह्योला ताम मि छ्योमुला रो । बिमुला । खालाइमि ब्रिबाला मिनरि । गे लाबाला मिनरि । ग्योइला मिनरि । जोडि आखिबा जा जामेएन छ्योनान मुला । तिक्दा ब्राल्साङ आलाबा बिसि खालाइसे खालाइदा आबिनि । स्याप्साम बुर्गान आस्याप्साम च्युर्गान । बिसि चिबाएन म्राङजि । ब्रेल्साङ आलाबा हेन्से केन आतानि । खालाइदा खालाइसे केन बिसि फ्या लाबारि आतोनि । स्युमे बिसि फ्या लाबारि आतोनि । केन आतानि । स्युमि आतानि । केन स्युमे आरेबा । खालाइदा म्हा बिआतोबा । खालाइला जासे खालाइला जामे ब्रेल्साङ आलाबाहेन्से केन आतानि । स्योलोन आतानि । कोन आतानि । खालाइदा आङि बिसि फ्या लाबारि निआतोनि । सालि आतानि । बिआतोनि । कोन आतानि । कोन्मे आतानि । म्हा आतानि । म्हागेन आतानि । जामेकोला ताजि । जामेम्हा आतानि । म्हाकोला आताबाहेन्से चाङ स्युमि आतानि । जोठानि देउरानि आतानि । आगु आसु आतानि । खालाइसे खालाइदा सगुनपोङ थोसि पुइ जुसि ब्राआतोनि । छारचाङ बाबा हिन्साम छारदिम दोला । क्योङलान दिमनाम ताला । ह्रापह्रुप ताला । थाप्साङ ताला । ब्रेल्साङ ताला । क्वान ख्वाबा रिमठिम तेन्बारि खाम्ला । तामाङला रिमठिमरि क्योङनोन ताला । क्वान ख्वाबाहेन्से स्ह्यामा पिन्बा दोनाला ठिमदा तेन्बारि खाम्ला ।
तिरेम किन्बा म्हिला केवारि खाम्देदोना रामरस लोनोन तोला । लाबासे लाला । ब्रोइ म्ह्याङला । नातागोता थेन तामाङ रिमठिमला ज्ञान्छ्या म्हान्ला । डान्ला । फिरफिर स्याम्याङला । मायाला न्हानरि डिहिला म्हेन्दो फार्ना लाखाम्ला ।
आर.के जिम्बा ‘पूर्वेली’