सम्झून् सन्ततिले नित्य पिताको मुखमाधुरी
आफ्ना सन्ततिका लागि मुटु बाँड्छन् बरोबरी ।।

कसैको तुलना हुन्न आमाका ममतासँग
आमामा ममता हुन्छ स्नेह हुन्छ पितासँग ।।

पिताको भूमिका हुन्न भनेको जब सुन्छु म
पिताकै योग्यतातर्फ यो सोच्न बाध्य हुन्छु म ।।

आमाको भूमिका हुन्न भन्ने यो हैन आशय
उनको भूमिकामाथि छ सधैं जयको जय ।।

परेली पिरले भिज्छन् आमाका तर बाबुमा
छाती भित्रै लुकाएर राख्तछन् पिर काबुमा ।।

आमाको योग्यतामाथि किञ्चित् शङ्का म गर्दिनँ
बाबुको योग्यता बेग्लै छ भन्न पछि पर्दिनँ ।।

आमाका दशधाराले हामी हुन्छौं हराभरा
छातातुल्य पिता हुन्छन् आमा सिङ्गै वसुन्धरा ।।

पिताले थाप्तछन् थाप्लो भाग्छन् दुर्लङ्घ्य आपदा
घरमा जब उर्लन्छन् अनिकाल सदा सदा ।।

पिताकै पहिले पर्छन् थाप्लोमाथि अनेकन
बिब्ल्याँटा वस्तुको भारी भन्दैनन् थाप्न सक्तिनँ ।।

घोडाले बग्गी हाँके झैं व्यवहार चलाउँछन्
आफ्ना सन्ततिका लागि आफैंलाई जलाउँछन् ।।

पिताको योग्यतालाई नकार्ने जब देख्छु म
कसैले बाबुका लागि भन्दैन केही लेख्छु म ।।

श्रमको खालमा हाम फालेर बाबु तप्त छन्
गुणगान यतातर्फ आमाकै मात्र जप्तछन् ।।

आमाको तुलना हुन्न यो कुरा ध्रुवसत्य
तर त्यो बाबुको मूल्य भन्नुहोस् के असत्य छ ?

आफ्ना सन्ततिका लागि कर्म गर्छन् अहर्निष
साठी माथि हुँदासम्म बन्नै पर्दछ बत्तिस ।।

बाबु हुन् बाबु हु्न् बाबु सक्तैन जोसुकै हुन
पिताले पनि सक्तैनन् माताको योग्यता छुन ।।

रापमा तापमा त्यस्तै श्रमको अग्निकुण्डमा
पिल्सिन्छन् बाबु हुन् एक्लै रहे तापनि झुन्डमा ।।

सधैं टन्टा सधैं लन्ठा ताप बोक्छन् घरी घरी
बोक्तैमा बाबुका केस फुल्छन् काँस फुले सरि ।।

आफ्ना इच्छा डढाएर घरमा पूर्ति गर्दछन्
मर्यादासम्म राख्तैनन् छोराले फुर्ती गर्दछन् ।।

उनैका पसिनाबाट परिवार चलाउँछन्
तथापि कतिले ज्यूँदै उनैलाई जलाउँछन् ।।

ताजा खाद्यान्नको इच्छा अथवा स्वादिलो खिर
खाने इच्छा जसै हुन्छ भार पर्छन् उनैतिर ।।

म ता भन्छु पिता हाम्रा महासागर सिन्धु हुन्
घरका सबको भित्री इच्छाका केन्द्रबिन्दु हुन् ।।

बाबुको थालमा निस्तो भातमा केही साग छ
घरमा नुनको हैन सुनको अझ माग छ ।।

बेचिन्छन् अथवा पर्छन् तातो राप र घानमा
छोराको अथवा त्यस्तै छोरीको परिधानमा ।।

होन्डा चढ्ने छ छोराको इच्छा नित्य उनैसँग
डढेलो मनमा लाग्छ के भनून् त्यो कसैसँग ।।

नौलो फेसनमा हाम्रो देशभित्र विधान छन्
घुँडामा च्यातिने धेरै छोरीका परिधान छन् ।।

यस्तै छ हे पिता हाम्रो आज यो देशको थिति
नभन्नू कहिल्यै आफ्नो सिद्धियो सकियो मिति ।।

पिता हुन् मान सम्मान पिता हुन् अनुशासन
यो विश्व भित्र को सक्छ पिताको लिन आसन ।।

बाँचेसम्म सधैं राप तापमा बाबु पर्दछन्
मरेको एक घन्टैमा छोराले पिण्ड गर्दछन् ।।

यसैले बाबुका धेरै खोज्न थाले विशेषता
भेटिन्छन् अहिलेलाई चूपै लाग्न प-यो म ता ।।

।।इति।।