Skip to content

आज जानलाई जिद्दी नगर

RamPrasadGautam


गोधूलि यो साँझलाई आज मेरो साथमा
वच्चा जस्तै तिमीलाई राख्ने चाह काखमा
फेरि कहिले भेटने हो छैन केही तिम्रो भर
आज जानलाई जिद्दी नगर ।

मलाई तिम्रो प्रतिक्षामा राधा वन्ने मन छैन
सधैं तडपिरहनेलाई प्रेम भन्न तयार छैन
सँगै हुँदा साथलाई साथ दिने कुरा गर
आज जानलाई जिद्दी नगर ।

तिमीलाई पर्खदैमा पात्रो सबै कोरिसकेँ
प्रत्येक दिनमा चिन्हो लगाई नवुझिने वनाइसकेँ
घरका सबै मेरो चालले मानिसके अब हार
आज जानलाई जिद्धी नगर ।

मेरो चाह यत्तिमात्रै अब विछोड सह्य हुन्न
तिम्रो साथभन्दा अरु कुनै औषधीले छुन्न
यो विमारी तिम्रो साथले मात्र ठिक हुन्छ हेर
आज जानलाई जिद्धी नगर ।

मेरो रात कति बिते तिमीलाई सम्झदैमा
आँखा चिम्ली लगातार तिम्रो तस्विर हेर्दैमा
अब मेरो चाहना छ एउटै बनाउने घर
आज जानलाई जिद्दि नगर ।

सबैलाई बिहानी यो कति राम्रो लाग्छ हेर
मेरो लागि त्यै बिहानी आफैलाई काटने धार
भयो–भयो सुन्दिन म टाढा जाने बात नगर
आज जानलाई जिद्दि नगर ।

प्रभातले सोध्छ मलाई सपनीमा मिलन भो र ?
चन्द्रमाको त्यही प्रश्न दिनमा ऊ आको थ्यो र ?
आको थ्यो नि, भेट भयो भन्ने दिन आउदैन र
आज जानलाई जिद्दी नगर ।

रात हुन्छ आकाशमा तारा धेरै सँगैसँगै
एउटा लुक्छ वादलभित्र अर्को खोज्छ रमाई रमाई
मलाई पनि तिमीसँगै रमाउने मन छैन र ?
आज जानलाई जिद्दी नगर ।

न आज भो तिम्रो साथ न ग्यारेन्टी छ नै पछि
ज्यानै जान्छ जब तिम्रो जाने पाइला वढछ अघि
मेरो ज्यान वचाउनलाई तिमी आज रोकिन्नौ र ?
आज जानलाई जिद्धी नगर ।

त्यो भोलिको के भरोसा, किन भोलि भोलि भन्छौ
आजको यो भेटलाई किन लामो बनाउन्नौ
सधैं मैले मिलन पछि विछोडमै रुनू छ र
आज जानलाई जिद्दी नगर ।

विछोडमा भोलि मिलन हुन्छ भन्ने आश हुन्छ
मिलनमा भोलि हुने विछोडको त्रास हुन्छ
यो आश र त्रासलाई भगाउँदा हुदैन र
आज जानलाई जिद्दी नगर ।

– रामप्रसाद गौतम
मेचीनगर–६ झापा
हाल : राजविराज–७ सप्तरी
योग्यता : बि.एल., एम.ए., बि.एड.
मोबाइल नम्बर :–९८४२८३३३१४, ९८०४७११०३३

पिताको नाम :– विष्णुप्रसाद गौतम
माताको नाम :– स्व. विष्णुमाया गौतम
पेशा :– कानून व्यवसायी विगत १९ वर्षदेखि

Leave a Reply

Your email address will not be published. Required fields are marked *