परिवर्तन जे भए नि, अंशियार उनै
पाश्र्वबाट सल्लाह दिने, मतियार उनै ।
समातेर भ्रष्टलाई, सजाय नतोकेर
चोख्याएर छोडिदिने, अख्तियार उनै ।
बगलीमा छुरा राखी, हितचिन्तक बन्ने
छिमेकीको माटो खोस्ने, सन्धियार उनै।
मौका हेरी बोली-भाका, जति फेरे पनि
कुटिलताले चलाउने, हतियार उनै।
मोही र तल्सिङ्बीचमा, भागबण्डा हुँदा
मोही जति फेरिए पनि, अधियार उनै ।
सर्वहारा, सीमान्तकृत, नारा सबै बेकार
सत्ताभित्र पुगेपछि, सच्चा यार उनै ।
कैलाली