Skip to content


पार्टीको कार्यकर्ता
अबेला उठ्यो
कागजको एउटा टुक्रामा
‘व’ अक्षर देख्यो
वर्गसङ्घर्षका कसहरू
रेडलेबलले कुल्ला गरिसकेको हो
यो शब्दले तैपनि पिछा छाडेन
मनमनै भन्यो
त्यो कागज फाल्यो
र पिच्च थुक्यो ।
नयाँ यात्राको लागि
जातपातका मरमसला हालेर
राजनीतिक पकवान तयार गर्‍यो
तात्तातो नाराको लेवल लगायो
विचारसँगै लुगा फेर्‍यो
चिरिच्याट्ट पर्‍यो
जीवनशैली बदल्यो
मोटरसाइकल स्टार्ट गर्‍यो
र कुद्यो ।
गणतन्त्र दिवसको कार्यक्रम
झकिझकाउ थियो
बाजागाजा
नारा-जुलुस
र चर्का भाषण थिए
मञ्चमा अरू सबै थिए
लोकतन्त्र थिएन
छक्क पर्‍यो
झल्याँस्स सम्झ्यो
दौडेर कोठामा गयो
लोकतन्त्र सुतिरहेकै थियो
बिहान राखिदिएको चिया
चिस्सिइसकेको र धूलो जमेको थियो ।

हेटौंडा-११, नवलपुर

Leave a Reply

Your email address will not be published. Required fields are marked *