कहाँ जाउँ-कता जाउँ ठाउँ नै छैन भन्छन् हजुर
डढेलोले नखाएको गाउँ नै छैन भन्छन् हजुर !
सन्नाटाले छाएको छ उराठ- उदास मनहरू
तड्पिएर नबसेको घाउ नै छैन भन्छन् हजुर !
साँघु तुईन काटी सके, माझी डरले भागीसके
वारिदेखि पारि तर्ने नाउ नै छैन भन्छन् हजुर !
कति मान्छे मरिसके, कति रगत बगिसके
अझै यहाँ मान्छेको कुनै भाउ नै छैन भन्छन् हजुर !
कुनै घाईते गुँडभित्र, कुनै बचरा मारिएका
कहाँ गईन् जुरेलीको माउ नै छैन भन्छन् हजुर !