समस्याको जालोमा

समस्याको जालोमा
पुतली झैँ अल्झिरहें
पिल्सिरहने घाउ पनि
पल पल बल्झिरहे ।

त्यसैले त छटपटिँदै
आएँ पर-पर,
छाडेर साथी सङ्गी
आफ्नै गाउँ घर ।।

भन्नलाई त भन्थे आफैं
आफ्नै देशमा गर्छु,
बैरी डलर चहिन्न भो
कोदो मकै भर्छु ।

सोच्नु मात्रै भयो यी सब
आउनु पर्यो फर्की,
बस्नु पर्यो दुर देशमा
मुटु चर्की चर्की ।

तर हरेस खाको छैन
फिर्छु घर छिटै,
देखाउनुछ केही गरी
बरु खान्छु पिठै ।

राजेश रुम्बा लामा “अतृप्त”