मायालु त्यो बोलीभित्र कति ठुलो घात रैछ
सुम्सुम्याउँदै गला रेट्ने कस्तो पापी हात रैछ ।
बुद्ध खुशी हुन्थे होला तिम्रो दर्शन सुन्न पाए
यथार्थमा त्यो त मान्छे फँसाउने बात रैछ ।
सारी चोलो लत्याएर बियर तान्दै मिनिस्कर्टमा
दिउँसै रात पर्न खोज्ने जँड्याहाको जात रैछ ।
मग्मगाउने वरिपरि सुन्दर फूलबारी देखी
पाइला टेक्दा दलानमा दुर्व्यसनको खात रैछ ।
डर धम्की दिंदै अझै छेउ तान्ने कोसिस तिम्रो
अरु केही नभएर ठूलो पदको मात रैछ ।