नजरभरिको सपना जस्केलामा खसेपछि

नजरभरिको सपना जस्केलामा खसेपछि
धर्धरी रुन्छु म देशको सम्झनाले डसेपछि !

बादलपारि देख्छु सधैं नेपालको छाया
आएर यी विरानाहरुको सहरमा बसेपछि !

पहिरोले बगाउँछ मेरो प्यारो घरबारी
मनको बाढी उर्लिएर हृदयमा पसेपछि !

सधैं भरि यो अर्कैको झन्डा मुस्कुराउँछ
दासताको छुरी मेरै छातिभित्र धसेपछि !

सपनीमा आजभोलि धेरै धेरै हाँस्छु-
देशलाई सिर्जनाको अंगालोमा कसेपछि !