छिरबिरे नयाँ लुगा,
हर्ष उमंगले फुरुङ हुँदै ।
लिङ्गे पिङ्ग र र्‍वाटे पिङ्गहरूमा,
साथी-संगीहरू जमघटसँगै ।
कस्तो यादले सतायो आज,
सम्झे घर घरमा जमरा छरेको ।
नब दुर्गा भवानीको पूजासँगै,
प्रतेक दिन जमरामा दियो भरेको ।
नवौं दिनको मध्य रातमा,
कालरात्रीको पूजापछि ।
दशौ दिनमा रङिने पर्व,
टिका जमरा अक्षता मुछी ।
निधारमा रातो टिकासँगै,
सिरमा हुन्थ्यो जमरा
परिकारहरू त सबका घरमा
भुन्भुनाउथे जताततै नानाथरी भमरा ।
आशिर्बाद त कति हुन कति ,
दिने लिने दुबैलाई गाह्रो हुन्थ्यो
आफू त सानी फुच्ची केटि ,
आशिर्बाद भन्दा पनि पैसै प्यारो हुन्थ्यो ।

घर घर चाहार्यो टिका थाप्दै,
जिब्रोको स्वाद पनि फेरिन्थ्यो ।
पैसा गन्दै खल्ती छाम्दै,
यो दशैं कहिल्यै नजावोस हुन्थ्यो ।
लङ्गुर बुर्जा,छ्क्का मारा,
धेरै जम्थे जुवातासमा ।
घरबार सबै कौडा खेल्थे,
अरुलाई जोगी बनाउने आशमा ।
बाल्यकालको दशैं यस्तो,
मिल्थ्यो खुशी कस्तो कस्तो ।
गरीबलाई दशैं दशा जस्तो
बाल्यकालको दशैं यस्तो

सुभद्रा भण्डारी,इजरायल