फलामले बनेको हुँ खन्ती मेरो नाम
धस्सिएर धर्ती खन्नु मेरो पैलो काम
कामी दाइका आरनमा खारिएको म
तताएर तिखोतिखो पारिएको म
ढुङ्गोमाटो खोस्रीखोस्री खाल्टो पार्दछु
त्यै खाल्टोमा सिर्जनाका बोट सार्दछु ।
चट्टानले छेके पनि पछि र्फकन्न
डोबहरू थर्के पनि म त थर्कन्न
काम गर्छु मानिसले भने अन्सार
बनाउनु छ नयाँ घर नया संसार ।
लिङ्गासिङ्गा गाड्नु परे तयारै छु म
खामासामा गाड्नु परे तयारै छु म
हे मान्छे हो ? जाँगरी भै खन्ती समात
धोका दिने काम कैल्यै हुन्न मबाट ।
ढुङ्गोमाटो जति चुम्यो त्यति बासना
मोलुवा र बोधो भए सधैँ सासना
हुनुपर्छ हामी खरो आफ्नो काममा
नयाँ बाटो खोज्नुपर्छ कडा जाममा ।
हीरामोती महलमा के सोच्दा हुन् खै
जुहारतको खन्ती मैले देख्या छैन है!
म त सस्तो फलाम हुँ तर मूल्यवान्
संसारका श्रमिक हुन् मेरा भगवान् ।