Pankaj

विचित्र प्रेम
मेरो अनि उसको
शून्यता अनि पवित्रता
स्पष्ट अटुटता र जटिलता
बोकेको अलौकिक सम्बन्ध
ह्वाइटबोर्ड र मेरो ।

आजकल म ऐनामा आफूलाई
प्रायः नियाल्छु, कारण
मेरो सुन्दरता जाँच्न हैन
ती खोटहरु पहिल्याउन
जो तिम्रो नजरमा स्पष्टिए
र त विकल्प खोज्यौ,
बद्लिदै छ ऐना हेराइको परिभाषा।

अनगिन्ति शरीरहरुबाट छुट्टै
चरित्र तिम्रो महसूस गर्ने यो
प्राणदाता हृदयलाई एक्कासि
आँखा र कानहरुले गिज्याउदैछन
र तिमीलाइ पनि चरित्रहीनहरुको
पंक्तिमा उभ्याउदैछन चेतनाहरु,
बद्लिदै छ तिम्रो चरित्रको परिभाषा।

खै संगीतको सुक्ष्मानन्दमा
डुब्ने म किन हो किन
शब्दहरुको वेदनाहरुमा पिल्सिदै छु
छटपटाउदै, बौलाउदै अनि रुदै
भुलाउने असफल चेष्टा र
कालो यादको कर्कश धुन माझ,
बद्लिदै छ आज संगीतहरुको परिभाषा।