चे-कम्यून २०६६

अनायसै पर्दा उघ्रिएछ आज
रहस्यमयी एउटा झ्यालको
हावाको हरेक झोँक्काको श्पर्शसँगै
कता कता उन्मुक्त खुलेझैँ लाग्ने
तर सधैँ विवशताको बन्धक बनेको
त्यही पल्लो घरको झ्यालको ।

आज हेर्दा हेर्दै आफै खुलेको छ त्यो पर्दा
सजाएर राखेको गुडिया छ झ्यालमा
एउटा विचित्र सँयोग हुनसक्छ यो
या त नियोजित क्रमभङ्गता
पूर्वी क्षितिजका कलेजी किरणहरूसँगै
शुरुवात विनाको यौटा कथा टुङ्ग्याएर
अन्त्यहीन नयाँ कथा आरम्भ गर्दै
मेरो सम्मुख देखिएको छ त्यो गुडिया
अझ मेरा दूरकेन्द्रीत नयनहरू
आफूतिर भरमग्दूर खिच्न खोज्दै
मौनताको भाषामा केही भनिरहेको छ मलाई ।

मैले वर्षौदेखि देखिरहेको छु उसलाई