म त भन्छु देश चलाउन, ठेक्कामा नै दिउँ हेर,
आह्वान गरी बोलपत्र, आवेदन नै लिउँ हेर।
मुकुट थियो,घाम आयो, रूख अनि जङ्गल छायो,
आफ्नै हात जगन्नाथ, जनताको चै निउँ हेर।
हट्ने होइन डटी लड्ने, ङिच्च गरी झोली थाप्ने,
वीर हामी पानी धरि, मागेर नै पिउँ हेर।
देशप्रेम नशामै बग्छ, मुटुमा हाम्रो चन्द्र सूर्य,
डिभी भर्न लाम लागी, देशभक्त भै जिउँ हेर।
बाँच्नु अझै छ र त, मर्न डराउँछु आमा,
हिँड्नु अझै छ र त, मर्न डराउँछु आमा।
एकबारको जुनी यो, सिकाई माग्नु कति छ,
भ्याउनु अझै छ र त, मर्न डराउँछु आमा।
पाउँछौ जति थपेर देउ, भन्नु भा’को होइन?
फर्काउनु अझै छ र त, मर्न डराउँछु आमा।
कुरीतिको मियो घुम्दै, दाइँ गर्दैछन् गोरू,
फुकाउनु अझै छ र त,मर्न डराउँछु आमा।
बलियाले थिच्न कहाँ, छोडेछ र निर्धालाई,
लड्नु अझै छ र त, मर्न डराउँछु आमा।
