तिलक कार्की

शिशिरको तुषारपात अनि गृष्मको पतझड
उजाडसँगै नैराश्यता, निर्धनता र नाङ्गोपन
चराहरूको गुँड सबार, अनि सूर्यको मलिन मुहार
पहेँलिएर झरेका पातहरू,
काँडामात्र रहेर बँचेका फूलका हाँगाहरू
बैंसको मातले संसार लत्याउने जवान

सुन्दर, शान्त, सम्पन्न गाउँ । गाउँ नजिकै सल्लेनी वन । वनमा जिजुका पालाका बडाबडा सल्लाका रुख । वन पनि बाक्लै रुखले ढाकेको थियो । रुखका टुप्पा र हाँगामा काग, चिल, सुइके, सिकारीलगाएत मांसाहारी चराका गुँड थिए । तल भुँइमा खरायो, कालिज, मृग आदि पशुपंक्षीको बास थियो । प्रसस्तै बाँदरको टोली त्यसमा राता र सेता ढेँडु पनि थिए ।