कन्हैया नासननी

धत्तेरिका !
एक-दुई अँगालो मात्र भए पनि
अमर-माया पैँचो दिने
कोही छैन
पाएको भए राम्रै हुन्थ्यो नि त
हैन र ?
सके सास छँदै तिर्थेंं
नसके दर्गाहमा तिर्थें
सारा जुनी आफ्नो
साहू तिरेरै त बित्या छ ।

वसन्त पञ्चमीको दिन । एकाबिहानै एउटा भाले जुरेली अग्लो रूखको टुप्पामा बस्यो र सुरिलो स्वरले गीत गाएर वसन्त ऋतुको आगमन भइसकेको घोषणा गर्‍यो । नववसन्तको स्वागतमा आ-आफ्नो तर्फबाट गर्नुपर्ने तयारीमा लाग्न पनि त्यसले गीतकै भाषामा सम्पूर्ण प्राणीजगत्लाई निवेदन गर्‍यो ।