मधुपर्क २०६७ साउन

जिन्दगी एउटा अपरिभाषेय वस्तु … । संसारका ठूलाठूला दार्शनिकहरूले पनि उहिलेदेखि अहिलेसम्म अनेक तरिकाले अथ्र्याउन प्रयत्न गर्दा पनि राम्ररी नअर्थिएको वस्तु । जिन्दगीलाई कसैले धर्मसँग त कसैले कर्मसँग जोडेर अथ्र्याए, कसैले राजनीतिसँग त कसैले अर्थनीतिसँग अनि कसैले भोकसँग त कसैले भोगसँग जोडेर अथ्र्याए पनि पूर्ण अर्थ दिन नसकिएको वस्तु । अनेकले अनेक ढङ्गले अर्थ्याउन खोजेको तैपनि राम्ररी नअर्थिएको अनि जति अर्थ्याउन खोजे पनि चुरो भेट्टाउन नसकी टुप्पो समाउँदा फेद फुत्किने र फेद समाउँदा टुप्पो फुत्किने अद्भुत वस्तु ।

भियाना अस्ट्रियाको राजधानी हो । अहिले युरोपियन युनियनको सदस्य राष्ट्रको रूपमा पनि परिचित भएको छ । यो मेरो सपनाको सहर पनि हो । मेरो सपनाको सहर सिड्नी पनि थियो जसको भ्रमण २००६ को अक्टुवरमा सम्पन्न गरेको थिएँ । त्यतिबेला म राष्ट्रिय मानव अधिकार आयोगको सदस्य थिएँ । मेरो सपनाका सहरहरूमा फ्रान्सको राजधानी पेरिस, बेलायतको राजधानी लण्डन र स्विट्जरल्यान्डको राजधानी जेनेभा पनि हो । तर यसको भ्रमण सम्भव होला कि नहोला भन्न सकिन्न ।