नवराज बस्याल

संसारमा अलिक बढी नै चर्चा हुने विषय वस्तुहरूको खोजी गरियो भने पक्कै पनि माया प्रेम नै शिर्ष स्थानमा हुन्छ । यहाँ माया प्रेम अनि विछोडका विषयमा जति गीत र कविता लेखिएका छन् शायद अरु कमै विषयमा लेखिएका होलान् । प्रेम किन हुन्छ ? अथवा प्रेमको परिभाषा के हो भनेर खोजी गर्नेहरूको पनि कमी छैन यहाँ । तर प्रत्येक पटक फरक–फरक नजिता आइरहन्छ किनकि यहाँ सधैं मिलन खुशीका पलहरूलाई प्रेम भन्नेहरू, अरुको खुशीमा प्रेम देख्नेहरूको पनि कमी छैन । तर, अँझै पनि कसैले प्रेम यो हो र यसकारण हुन्छ भन्दै विभिन्न तर्क अघि सारेता पनि ती सबै सर्वमान्य छैनन् । फेरि पनि, प्रेम एउटा अदभुत् अनुभव हो ।

परदेशी भूमि नौलो थियो मेरो लागि, पहिलो पटक परदेश गएको भएता पनि पनि २ वर्षभन्दा बढी समय बितिसकेको थियो । स्वदेशमा हुँदा कहिले परदेशमा पुगेर कमाउला भन्ने रहर अनि परदेशी भूमिमा टेकेपछि घरपरिवार साथीभाइ अँझै बढी देशको माया, राष्ट्रियता पनि कहाँबाट पलाउँदो रहेछ कुन्नि । फेरि पनिरहरभन्दा करले नै परदेशिएको भन्न कर लाग्दो रहेछ परदेशमा पुगेपछि । नेपालका युवा प्रायजसो परदेशलाई नै आफ्नो कर्मभूमि बनाइरहेका छन् रहरले होस् वा बाध्यताले होस् जे जसो भएपनि कमाइको गतिलो माध्यम चाहि पक्कै बनेको छ । कसैलाई सरल होला त कसैलाई कठिन बाटो बनेको छ यो ।

त्यो एउटा सुरुवात थियो, सुरुवात तर अन्त्यका लागि सुरुवात । सुरुवात त भएको थियो तर अन्त्य हुनका सुरुवात । फेरि पनि यहाँ पुरा भयो अथवा सकियो भन्नु पनि गलत हुन सक्छ किनकि न त केही शुरु भएको आभास थियो न त केही चलिरहेको छ भन्नु केही थियो । तर पनि कति बाँकी छ भनेर देखाउनका लागि यसको कुनै आकार देखिदैन आकार नभएको पनि होइन यसको सायद, संसारको वृहत आकार यसैको थियो होला । न कसैलाई व्यक्त गर्न सके मैले न कसैलाई होइन भनेर भन्न सके मैले । यो पनि एउटा जिन्दगी जस्तै थियो हरेक पल पलमा घट्दै जाने कहीं कतै नरोकीने घरी घरी कलमको मसि सकिएसँगै सम्पूर्णलाई विश्राम लगाइ दिउ जस्तो लाग्थ्यो, आफैमा तालमेलको कमि थियो । दिलले अन्त्य गर्न खोज्दा दिमागले बाधा पुर्याइरहेको हुन्थ्यो ।