सिजन लामा “सोईसाल”

जब हरेक वर्ष तिहार आउँछ
मेरो त रित्तो निधार आउँछ

सबैका चेली केके ल्याउछन्
आफ्नो त रोटी न अचार आउँछ

कहिले दुःख हेरेर कहिले पिर हेरेर
रुन्छु घरी घरी आफ्नै तक्दिर हेरेर

कहा छुट्छ यो साथ टुटछ कहाँ देखी
कहिल्यै नछुटने जिन्दगीको जंजीर हेरेर

यति धेरै मन दुखेको थाहा कसलाई होला
ओठ तालु सब सुकेको थाहा कसलाई होला

दुनियालाई यति चाढै भन्न मात्रै सकिएन
तिम्रो मनमा म लुकेको थाहा कसलाई होला

मैले माया गर्दा तिम्रो मन छुन्छ छुन्न
आज सामू पर्दा तिम्रो मन छुन्छ छुन्न

थामी दिने हात दिए साथ पनि दिए
मेरो आँसु झार्दा तिम्रो मन छुन्छ छुन्न

सवालः एक्लै छोडी पराई देश नजाउ ल कान्छा
चाँडै फर्कि आउने बाचा गरिदेउ ल कान्छा

जवाफः तिम्लाई छाडी पराई देश कतै भा छ नभन्नु है
बाचा भयो एक्लै टाढा कतै भा छ नभन्नु है

सिस्ने खोला उर्लिदाको, मज्जा पनि बेग्लै
जोडी ढुकुर कुर्लिदाको, मज्जा पनि बेग्लै

जलकन्यामाईलाई भेटी, चढाएर आए
माया तिम्रो पर्किदाको, मज्जा पनि बेग्लै

छैंठौ दिनको कलमीले के के लेख्यौ भन भावी ।
त्रिकालकै सत्य तथ्य के के देख्यौ भन भावी ।।
अछेता र फुल पातीले सदा सदा पुज्ने छु म ।
ग्रह दसा सुभशान्ती के के भेट्यौ भन भावी ।।
नेपालका दाजु दिदि लड्छन मर्छन कहिले सम्म ।
ढुंगा मुढा चलिराछ , के के छेक्यौ भन भावी ।।
कोही भने फुटपाथमा कोही गगन महलमा ।
बन्द जाम हड्ताल भन्ने के के रेट्यौ भन भाबी
कालो बोको जोडी भाले भोग दिन्छु तिम्लाई ।
दुधको दुध पानीको पानी के के भेट्यौ भन भाबी ।।

पढ्ने बेला गोठाले र हली बसिएछ हजुर्
काधमा हलो कुटो बोकी गली बसिएछ हजुर्

डोकोभरि दाउरा घाँस घर वन गर्दै
आफ्नो भाग्य आफ्नो कर्म छली बसिएछ हजुर्

ओईलिएर तिमी झर्यौ, टुट्यौ कहाँ-कहाँदेखि
एक्लिएँ म पर भएँ, छुट्यौ कहाँ-कहाँदेखि

रित्तो भयो सिउँदो पनि, फुटे चुरा पोते सबै
अब छैन मातमा लाली, लुट्यौ कहाँ-कहाँदेखि

यसपाली अस्ताएको, घामको मूल्य तोकिएन ।
गरिबीको पसिनाको, कामको मूल्य तोकिएन ।।

एक छाक एक धरो, पाउन कत्रो संर्घष छ ।
थाप्लोमाथि भरियाको, डामको मूल्य तोकिएन ।।