जीवन काश्यप
आमा
मान्छे भित्र सँधै रहोस् सरलता सौहाद्रता शिष्टता
बोलीमा पनि होस् सुवास दिलको माया सँगै नम्रता ।
हेर्दा सुन्दर होस् मुहार हँसिलो मुस्कानका साथमा
आत्मा शुद्ध सँधै उदार पनको दृष्टान्त होस् बातमा ।।१।।
दोषी नेत्र भए समस्त जगतै देखिन्छ दोषी अरे
माटोमा पनि मिल्छ है सुन यहाँ खोजी मजाले गरे ।
सानो हुन्न कुनै बिशाल न कुनै पेशा तथा काम त्यो
आफ्नो जीवनको अभाव पहिलो खाँचो छ जो माम हो ।।२।।
ल्याऊँ भयो पालुवा
सम्झे हुन्छ सधैँ प्रसन्न मनमा बिर्से सधैँ पीरले
छाती दुख्छ यता चसक्क सँगले घोचे सरी झीरले ।
तिम्रो नाम लिदै हरेक पलमा बग्छन नदी झैँ गरी
आँखा मात्र नभै प्रसस्त पसिना आमा सधैँ बेसरी ।।१।।
आफ्नो देश भए अवस्य मन यो रम्थ्यो खुसी साथले
अर्कैको उपकारको रहर यो व्यर्थै गर्यो हातले ।
खाली हात उसै फिरेर घरको गर्जो नटर्ने भयो
तिम्रो दर्शनको थियो रहर जो आमा अधुरै रह्यो ।।२।।
आव्हान
बाचेँ भन्छन तर दिन दिनै मर्छ मान्छे घडीमा
कसले देख्यो ?जहर छ कडा कालको त्यो छडीमा ।
हिड्दा हिड्दै फरर मनको उड्छ पंक्षी नभैमा
के फर्केला?भन न वनको त्यो सुगा पिंजरामा ।।
तेरो मेरो कलह नगरी मात्र हाम्रो भने पो
हेरौँ लाग्ने जगत सबले खूव राम्रो हुनेथ्यो ।
जाने जान्छन तर पनि कतै सम्झना हुन्छ आलो
बन्दै आभा असल जन ती छर्दछन है उज्यालो ।।