पानाभरि शब्द पोख्छु

पानाभरि शब्द पोख्छु, तिम्रो सम्झनामा
हराए झैँ हुन्छु आफैँ, आफ्नै भावनामा ।

माया भन्नु यस्तै हो कि, सोधूँ सोधूँ लाग्छ
वर्षौँदेखि पागल छ दिल, कसको चाहनामा ?

प्यासी नयन टोलाएर, यता उता हेर्छन
के देखिन्छ ? के भेटिन्छ ? शून्य तिर्सनामा ।

मन्दिर धाएँ भजन गाएँ, पूजा पनि लाएँ
आएनन ती देउता मेरो, पूजा अर्चनामा ।

सानो हुनु अभिषाप भो, संसार ठुलाकै हो
मान्छे सधैँ रमाउछ, उस्को बन्दनामा ।

आफ्नैहरू भन्ने गर्छन,पागल भयो जीवन
तिम्रै गजल गुन्गुनाउछु, सायद मुर्छनामा ।