सूर्य चेम्जोङ

कतातिर लागौँ काँडा, दुईटै तिर छ
तल हेर्यो झिर छ, माथि ठाडो भीर छ

बिदेशमै गयो जीवन, घर फर्कौ भने
आफ्नै टाउको माथिको, ऋणको पीर छ

शिशिरको घुम्टो खोली, खुलेकी छे ऊ
सोह्र बर्षे जवानीले, फुलेकी छे ऊ

समयै हो कस्तुरी झैं, बिना खोज्दा खोज्दै
मेचीदेखि कालीसम्म, डुलेकी छे ऊ

बैशालु यो हावा आयो, छाती कस्यो मेरो
थाहै नपाई दिलमा, कोही पस्यो मेरो

त्यहीं जन्मे, हुर्के, बढेँ, बैश चढेपछि
यही माटोसँग गाढा, प्रेम बस्यो मेरो

मैले रुचाएको फूल, खास तिमी थियौ
साथै फोक्सोभित्र चल्ने, सास तिमी थियौ

हिजो आज बगैचाको, रुप बेग्लै भा छ
किनभने फूलको, सुवास तिमी थियौ

आज झर्ना-समुद्रको, नाउमा हुन्थेँ म
काश पानी हुँदो त, तलाउमा हुन्थेँ म

कठ्यांग्रिंदो जाडोसँग, मीठो जोरी खेल्थेँ
जति बेला तिम्रो तातो, बाहुमा हुन्थेँ म

ढुङ्गो जस्तो भइएछ, सस्तो भइएछ
सुन भएँ यति बेला, भाउमा हुन्थेँ म

हरेक साँझ जून, मलाई चिहाउँछ
न बोलाउँछ आकाशमा, न त आउँछ

किन लाग्छ सामु भए, पनि नभए झै
बैगुनी छे भनुँ भने, आँखा जुधाउँछ

सावनको झरी भनुँ, या त जादुगरी
खै के भनुँ तिमीलाई म, स्वप्न सुन्दरी

चाँदी दन्त, स्याउ गाला, मुहार हिमानी
बैशालु ओँठ, गुराँस झै, लाली जवानी
फूल भनुँ, जून भनुँ, या स्वर्गकी परी
खै के भनुँ तिमीलाई म, स्वप्न सुन्दरी

मेरो साथ तिम्रो चिठी, खात बाँकी छ
तिमी गए पनि तिम्रो, याद बाँकी छ

जिन्दगीमा कैयन, चिसो रात काँटे
कटाउन अँझ कति, रात बाँकी छ

छैन कोशी, कर्णाली काली अरुण छैन
लाखौं तारा भए, के एउटा जून छैन ?

एकाबिहान हत्या भो जोडी परेवाको
को हत्यारा भनौं र हातमा खुन छैन

मेरो जिन्दगानी तिमी, मेरी जून, घाम
शंका लाग्छ भने मेरो, आऊ मुटु छाम

मौसम–हावा आज किन, चुप देख्छु म?
चारतिर केवल तिम्रो, रुप देख्छु म ।

आकाश छोडी चन्द्रले, धरती झरेपछि,
धरतीको बेग्लै आज, स्वरुप देख्छु म ।

त्यति रुन्छु यहाँ जति, त्यहाँ रुन्छौ तिमी
दुबै आँखा चिम्म गर्दा, सँगै हुन्छौ तिमी

मेरो सपनीमा आई, सधैं डुलिरहन्छौ
सम्झनामा-कल्पनामा, सधैं फुलिरहन्छौ ।
मैले रोए-कराएको, न त सुन्छौ तिमी
दुबै आँखा चिम्म गर्दा, सँगै हुन्छौ तिमी ।

बितेको पुरानो, कहानी याद आयो ।
फक्रेर झरेको, जवानी याद आयो ।

मेरो दिलमा तिमीले, यस्तो गरेकी थ्यौ ।
उस बेला तिमी सारै, मन परेकी थ्यौ ।

भमरा नै फूल छोडी तिमी पछि थिए
साना साना नयनमा, मात भरेकी थ्यौ ।

तिमीसँगै रुझेको, बर्षातको याद आयो ।
र दुवै एक भएको, रातको याद आयो ।

थोरै डर थोरै लाज, मनमा नजनिंदो !
आज त्यो पहिलो, मुलाकातको याद आयो ।

ए! कस्तो घडीमा, उभ्यायौ तिमीले?
हँसाई-हँसाई, रुवायौ तिमीले ।

म हाँसू कसोरी, म बाँचू कसोरी ?
मबाटै कलेजो, चुडायौ तिमीले ।

त्यो रात.., त्यो झरी.., असिनाको याद गर
एक साथ खलखली, पसिनाको याद गर
छोएकै छैन भन्छौ भने पनि, के नै भो र ?
एक पल्ट तिम्रो चिनो, हसिनाको याद गर ।