हरि गौतम अर्घाखाँची

यो जीवनमा तिमीलाई पाउँछु कि भनी
गरिन के दिलमा बसाउँछु कि भनी

आफ्नै घरको जमीन छोडी, शहरतिर किन सरौं
हलो-जुवा गरी बरू, लाग्छ गाउँमै खेती गरौं

युद्ध गर्नुपूर्व यसै खुकुरीमा धार हुनै पर्छ
चुप्प लागेर भएन अब साथी खुंखार हुनै पर्छ

थाहा छैन म को हुँ, मलाई आफैं
हुन्छ, कहिले त मरूँ, जलाई आफैं

उनीसँग भेट्ने मेरो, अन्तिम एउटा धोको थियो
मनभरि माया अनि, वेदनाको पोको थियो

छाडी गयौ र? होइन लाग्छ, चारैतिर खोज्दै छु म
साँचो हो कि कल्पना मात्र, किन यस्त सोच्दै छु म

आशिष दिनुस आमा-बुवा, सोचेको काम आँट्न सकौं
भित्री पीडा लुकाएर, सबैलाई खुसी बाँट्न सकौं

पोहोर साल झैं यो साल आमा, गाउँमा आउन नपाइने भो
बाल्य कालकासँग साथी साथ, रमाउन नपाइने भो

सादा जीवन फिल्मी भए म नि तिम्रै हुन्थें होला
हाम्रो जोडी छुटाउनेलाई नमज्जाले धुन्थें होला

जलेको मनलाई शीतल, आश केहो बुझें मैले
रदिफ र काफियाको, राश केहो बुझें मैले

साँचो प्रेम गरी तिम्लाई, गल्ती गरें मैले
सोझो मनलाई विश्वास दिलाई, गल्ती गरें मैले

दु:ख पीडा सबै बिर्से, तिमी आएपछि
मुटुभित्र धड्कन बनी, दिलमा छाएपछि

केही छिन त टाढा हुँदा, गाह्रो हुन्छ सहन प्यारी
दुईचार वर्ष विदेशमा गई, के सकुला रहन प्यारी

छोराहरू हुर्काउँछन, बा-आमाले खाई नखाई
आज उनी एक्लै हुदा, आँशु पुछ्ने भएन कोई

टुक्रेको मुटु वियोगमा मैले, बटुली राखेको छु
प्रेमको बदला पाएको चोट, असुली राखको छु

मर्नु त पक्कै पर्छ एक दिन, अमर यहाँ कोही छैन
सुकेको बोट नसोची हुँ अमर फुली राखेको छु

नेपाली देशभक्त युवा समाज, आजै अघि सर्न चाहन्छौं
सयौं फूलको एक माला भई, समाज सेवा गर्न चाहन्छौ

सफल बनाऊँ सबै मिली, यो महान अभियानलाई,
अन्यायसँग लड्दै भिड्दै, सबैको दु:ख हर्न चाहन्छौ

सुनाउँछु साथी मेरो गाउँदेखि टाँढा शहर छैन
तर-मलाई आफ्नो जन्म ठाउँ छोड्ने रहर छैन

धेरै देखें गाउँ छाडी शहर जाने आफन्तहरू,
थियो कमी केको गाउँमा, के ईटा गिट्टी पत्थर छैन

जिन्दगी खोला हो कि बगर सोच्नै सकिन मैले
गएर कहाँ टुंगिन्छ यो सफर सोच्नै सकिन मैले

लाग्दैछ, हिंड्दा-हिंड्दा जिन्दगीका यी गोरेटाहरू,
अहिले बाटोमा छु “की” पुग्दैन घर, सोच्नै सकिन मैले

सु:ख खोज्दै धेरै दूरी धाउनु पर्दो रैछ
त्यही खुशीमा थोरै पीडा पाउनु पर्दो रैछ

भित्र-भित्रै कुहिए नि भरोसाको छानो
नबिर्सिनु पहिले नै, छाउनु पर्दो रैछ

के छ विचार ? भन प्यारी, यो सालको तीजमा
गर्दै छौ त के तयारी ? यो सालको तीजमा

व्रत, पूजा राखी हौली, बाधा अड्चन हर्न
देवीदेउता खुशी पारी, यो सालको तीजमा