चलचित्रका गीत

अब त यो जिन्दगानी रोई रोई बित्ने भो
कसरी म बाँच्ने होला आफ्नै माया बिझ्ने भो

कहाँ छ तिम्रो र मेरो मिलनको बिन्दु
जब कि तिमीलाई टेक्न सुनको भूईं छ
मलाई ओत लाग्ने ठाउँसम्म छैन

आगो देखे आगो बन्ने पानी देखे पानी बन्ने
मलाई यस्तो अस्थीर मन नदेऊ
धेरै धेरै चोट लाग्ने तिमीले कोमल भनिरहेका
मलाई यस्तो स्पन्दन नदेऊ

एकान्तको खलबलीले मन भो भरंग
सम्झनाको भूमरीमा उठ्यो तरंग
कसलाई भनूँ मनको कुरा के भो भनेर
आफ्नै मान्छे बिझ्यो मलाई काँडा बनेर

आज मायालुको हो दर्शन पाएर
मेरो आशा लौ पलायो
हराभरा भएर जीवन्त उदायो

लुकीछिपी लुकीछिपी हेर्नेले
सुटुक्क मेरो मन चोर्नेले
सम्झिदेऊ बुझिदेऊ सुनिदेऊ
मलाई नेपाली माया मन पर्छ
मलाई नेपाली माया चाहिन्छ

सपना हो यो भनेदेखि सपनीमै मरूँ
अर्को जन्म पाएँ भने तिमीसँगै परूँ

न मेरो घरै छ न जागीरको भरै छ
न त मेरो धन छ खाली एउटा मन छ
भन आँट्छौ त मसँग यही वैसाखैमा

म छु यता कालीवारि कालीपारि मेरी माया
मेरो साथ छुटाइदियौ किन ईश्वर मेरै छायाँ

एउटा मान्छे मन पर्छ भुल्न सक्तिन
आफ्नो स्वरुप उसको सामु खुल्न सक्तिन
कुन साइतमा आँखा जुध्यो भुल्नै नसक्ने
कस्तो आपत पर्यो मलाई खुल्नै नसक्ने

चाँदीको भित्ता सुनको छानो मोतीको भण्डार
मानिस भयो लिलामी वस्तु यो कस्तो संसार
पैसाको लागि आजको मानिस सब पाप गर्दछ
धनको कैदी लोभको जेलमा निर्धन मर्दछ

चैत मास खडेरीमा डँढेलोले वनै कालो
उसको बाटो कुर्दा कुर्दा सुकसुकले मनै खायो

पसिनाको जलैले, मेहनतको मलैले
हामी आफ्नो भाग्य लेख्छौं,
आफ्नो पाखुराको बलैले

आहा! वनमा फुल फूलैफूल वासना चल्यो मनैमा
हाँसुहाँसु लाग्न थाल्यो लाली चढ्यो तनमा
भनूँ भन्नै नहुने
के मात लाग्यो नि होसै नहुने

मोहनी लाग्ला है गाउँलेको बोलीले
डाँडाकाँडा छहराको गीतले
ख्याल ठट्टा नगर अल्झेला बगर
बिर्सनेलाई सम्झनाको गीतले

बिरही माया अधुरो रह्यो बिर्सनु कसरी
तड्पाइदिन्छ जलाइदिन्छ याद आउँछ बेसरी

तिम्रो आँखाको सागरमा लहर लहर दौडिरहेछ
त्यही लहरमाझमा मेरो सपना पौडिरहेछ
यो सपनालाई तिमी किनार समाउन देऊ

मन्दिरमा छ कि मूर्तिमा माया
पत्थरमा छ कि धूलोमा माया
कोही त देखाऊ कोही त बताऊ
खै कहाँ छ कहाँ? कहाँ छ माया?

के भनुँ म कसो गरी परें
मोहिनीको मायाजालैमा
बोलाइरहने टोलाइरहने
त्यो आँखाको नीर तालैमा