ङादै एलान् मिसी च्याबा, सेम खाजी बोईमा।
एलान् लिरि छ्यामनुन् नेबा, सेम ताजी बोईमा।
ङाला धिम, आबा, आम्दा, ज्यानलाला बिसाम्;
एथेन् धिमनाम् सोबारी, ङाम् राजी बोईमा।
जोरीबैरीला ओन्साङ्ऱि, जा गिला आम्से;
जन्ति लासी होन्बारी, रहर लाजि बोईमा।
पिन्ला एदा सोदेदोना, चु डेन्बा मायाँ;
तिल्दा तोजी आईन् वा थे, म्हारम्हुई पाजी बोईमा।
मिख्लिसे ग्यालाम् पाङ्ला, आक्रागो ह्या म्हेन्दो।
ए ङाला सेम्तीङ् टाङ्ला, आक्रागो ह्या म्हेन्दो।
खाई पिन्ला मायाँ एदा, थेसे ङासे जति;
घाईमा तोला घाईमा बाङ्ला, आक्रागो ह्या म्हेन्दो।
घ्यामरी म्हेन्दो ठाम्आखाम्सै, पुजु ल्हेसी पिन्ला;
चुराङ्बान् टिम् भाग्या ह्याङ्ला, आक्रागो ह्या म्हेन्दो।
घाईमागी माङ्ररी खामा, डान्बा खाला सेम्दा;
एसे क्रामा थेसे म्राङ्ला, आक्रागो ह्या म्हेन्दो।
ख्रेन्बा न्हासी, फ्युबा न्हासी, ङा सोदेदोना;
जतन लाला मायाँ राङ्ला, आक्रागो ह्या म्हेन्दो।
सेम न्हाङरी थन्छी एद ङै गल्ती लजिम
प्लेक प्लेक तासाई,
फुइगेलाबा ङाला रहरला प्लु
पूपू म्हेन्दो सर्सी तैइला ह्यङ्ल माया आतैगैइ
हैमा हार्ङ्लान सारी तैला पाङ्बा ङाला टु’जे