वाचन सजिलोको लागि ( / ) अर्ध बिश्राम (/\) मध्ये बिश्राम
याद होला सबैलाई /दुष्ट राणा हटाएको /राष्ट्रघाती भनेका त्यै /राजशाही भगाएको /\आज नेता नयाँ आए /देश बाँड्दै लुटी खाए /क्रान्तिकारी भएकाछन् /दुख्छ मेरो त्यसैले मन्।
फेरिएको भए शासन /मुर्ख हामी हुनेथेनौं /खास नाताहरूलाई /मात्र जागिर दिनेथेनौ /\भाइचारा बिगार्दै छौ /छट्टु नेताहरू लाखौँ /रूपधारी भएकाछन् /दुख्छ मेरो त्यसैले मन्।
आफ्नै आत्मा तड्पिएर बेहाल छ यो छातिभित्र
माया पाए राख्ने ठाउँ बिशाल छ यो छातिभित्र ।
दुखी भन्छन् दुनियाँले उथल पुथल हुन्छ जीवन
मैले सँधै भोग्ने ठुलो भुचाल छ यो छातिभित्र ।
आज भोलि यो खाडीको घाम धेरै डराउँछ
जैले देखि थाहा पायो हिमाल छ यो छातिभित्र ।
परदेशमा दुःख गर्दा किन ठान्छौ पराय झैं?
हेर मेरो प्यारो देश नेपाल छ यो छातिभित्र ।
‘घायल’को दुःख पीडा सुन्न तयार छैनन् कोही
सुनाउँनै पर्छ भन्ने हड्ताल छ यो छातिभित्र ।
गुप्तेश्वर-३, रामेछाप
हालः अलऐन, संयुक्त अरब इमिरुट्स
©घायल २०१६
जोश जाँगर बल सबै त्यो जवानीमा थियो
एउटा नौलो रहर जिन्दगानीमा थियो ।
खै कहाँ के के भयो साथ छोड्यो आँसुले
चिस्सिएको आँसुको दह सिरानीमा थियो ।
साँझ कालो रातले निल्न लाथ्यो धर्ति नै
त्यै अनौठो त्रासदी यो बिहानीमा थियो ।
यो गरिबको सामुमा फुर्ति के देखाउँनू?
मात्र घर तिम्रो ठुलो राजधानीमा थियो ।
दोष देऊ चोट या पार ‘घायल’ यो मुटु
जो बसे मनमा उही भाग्यमानीमा थियो ।
बहर:- मदिद
शुत्र:- २१२२-२१२-/-२१२२-२१२
दलबीर सिंह बराइली ‘घायल’
गुप्तेश्वर-३, रामेछाप
हालः अलऐन, युएइ
©घायल २०१६
अचम्मै छ! तिम्रो कस्तो चाहना हो म बुझ्दिन
मेरो मृत्यु या जीवनको कामना हो म बुझ्दिन ।
सर्बश्रेष्ठ प्राणी मान्छे पत्थर बन्न थाले यहाँ
भगवान या दानवको सिर्जना हो म बुझ्दिन ।
हाँसो खुशी पिलाउँछु आँसुको छ प्यास भन्छौ
साँच्चै भन्छु तिम्रो कस्तो तिर्सना हो म बुझ्दिन ।
मानवता बिक्री हुन्छन् धर्मसँगै गाउँबस्तीमा
गरिबको उद्धार हो कि यातना हो म बुझ्दिन ।
जन्मदिने बाबु आमा भोकै नाङ्गै ‘घायल’ छन्
केको लागि प्रभुसँग प्रार्थना हो म बुझ्दिन ।
दलवीर सिंह बराइली ‘घायल’
गुप्तेश्वर-३, रामेछाप
हाल: अलऐन, संयुक्त अरब ईमिरेट्स
©घायल २०१५
खोलालाई सोधि हेर कहाँ पुग्ने बिचारमा छौ?
समयलाई पनि सोध किन तिमी हतारमा छौ?
खरिद बिक्रि हुन्छन् मान्छे नपत्याए ऐना हेर
बिक्रेता र क्रेता आफै जिन्दगीको बजारमा छौ ।
मनभित्र उथल पुथल किन हुन्छन् नसोध्नु है
आँधिहुरी सामान्य हो चाहनाको किनारमा छौ ।
भगवान नै छैनन् यहाँ नत्र भन कस्ले भेट्यो?
पूजा गरी मोक्ष मिल्ने अचम्मैको पत्यारमा छौ ।
‘घायल’हरु छट्पटिंदा पिडकहरु खुशी हुन्छौ?
यत्ति बुझ्नू यो धर्तिमा तिमी पनि करारमा छौ ।
गुप्तेश्वर-३,रामेछाप
हाल: अलऐन,युएई
©घायल
१,
च्यातिएको खुशीहरू टाल्नु किन पर्यो ?
जिउँदो यो लाशलाई फाल्नु किन पर्यो ?
धनी जस्तो चिन्ता पिर छैन मलाई त
कात्रोभित्र खल्ती मैले हाल्नु किन पर्यो ?
२,
कतिजना रिसाउँछन् बिना कारण नै
र सपनीमा आउँछन् बिना कारण नै
यस्तै रै’छ संसारको चलनहरू पनि
घायल पो बनाउँछन् बिना कारण नै?
३,
साँझ क्षेणिक रंगिएको क्षितिजको लाली जस्तो
शुन्यता छ जिन्दगीमा भित्र सबै खाली जस्तो
भाग्यरुपी कल्पनाको महलभित्र के के होलान्?
भएकोछु मन्दिर सामु घोप्टिएको थाली जस्तो ।
४,
आँसु पिउँनु पर्छ र आँसुले नुहाउँनु पर्छ
पीडा असैह्य हुन्छ र आँसु चुहाउँनु पर्छ
नत्र रोए झैं गरेर आँसुको बदनाम हुन्छ
अभावले पिल्सिएको झोकमा के भयो ?
लुटें, चोरें, ढाँटे, मैले भोकमा के भयो ?
धन सँगै हाँसो खुशी गुम्यो पालैपालो
घाटा मात्रै लाग्छ सबै थोकमा के भयो ?
आफ्नै मान्छे खुशी हुन्छन् दुखी मरेपछि
कस्को आँसु पुछ्दै सोधौं शोकमा के भयो ?
आफ्नो पेट पाल्न आफै लिलामीमा थिएँ
आफै हेर्न सक्छौ तिमी चोकमा के भयो ?
जवाफ के दिन्छौ ‘घायल’यमराजको सामु
सोध्लान् त्यहाँ भन तिम्रो लोकमा के भयो ?
गुप्तेश्वर-३,रामेछाप
हाल:अलऐन,संयुक्त अरब इमिरेट्स
©घायल
