अचम्मै छ! तिम्रो कस्तो चाहना हो म बुझ्दिन
मेरो मृत्यु या जीवनको कामना हो म बुझ्दिन ।
सर्बश्रेष्ठ प्राणी मान्छे पत्थर बन्न थाले यहाँ
भगवान या दानवको सिर्जना हो म बुझ्दिन ।
हाँसो खुशी पिलाउँछु आँसुको छ प्यास भन्छौ
साँच्चै भन्छु तिम्रो कस्तो तिर्सना हो म बुझ्दिन ।
मानवता बिक्री हुन्छन् धर्मसँगै गाउँबस्तीमा
गरिबको उद्धार हो कि यातना हो म बुझ्दिन ।
जन्मदिने बाबु आमा भोकै नाङ्गै ‘घायल’ छन्
केको लागि प्रभुसँग प्रार्थना हो म बुझ्दिन ।
दलवीर सिंह बराइली ‘घायल’
गुप्तेश्वर-३, रामेछाप
हाल: अलऐन, संयुक्त अरब ईमिरेट्स
©घायल २०१५