खगेन्द्र खिलाफी

सडकमा आगो बाल्ने, काम छ युवाको
प्रवासमा छिर्ने धेरै, लाम छ युवाको

राम्रो काम गर्न छाडे, आज किन कुन्नि?
हिंसा हत्या बलत्कारमा, नाम छ युवाको

पिठो मैदा पारी दिल, पेल्नु पर्ने भयो यहाँ
कति चाह गर्भ भित्रै, बेल्नु पर्ने भयो यहाँ

हेर्दा हेर्दै बिधाताले, लात हान्दा खेरी अब,
आफ्नै छाती माथि परेड खेल्नु पर्ने भयो यहाँ

बेकसुर निर्धालाई, घाटी नेकाउछन्
जाल झेल गरि यहां, घुडा टेकाउछन्

दु:ख अभाब के थाहा, ठुला धनीलाई,
महंगीले गरिबको, ढाड सेकाउछन्

मृत्‍युदण्ड हुनुपर्छ, अब बलत्कारीलाई
सम्मान सद्भाव गर, छोरी चेली नारीलाई

सबैसामु फाँसी दिने, संविधान बन्नु पर्छ,
दलाल गिरोह अनि, अब भ्रण्टचारीलाई

जति रगतको खोला, बगाए नि आखिरीमा,
कलमले जित्छ सधैं, हतियार धारीलाई

किचिएर बाचेको छु
थिचिएर बाचेको छु

भित्र भित्र अब सीमा,
मिचिएर बाचेको छु

गहमै यी आसु, अटाउदैछु म
मुश्किलमा ज्यान, खटाउदैछु म

नसोध खबर, परदेशीको तिमी,
रुँदै दिन यहाँ, कटाउदैछु म

झुठ्ठो जाली स्वार्थी माया, लाउनु के अर्थ ?
ठगी चोरी केही कुरा, पाउनु के अर्थ ?

सधै हुनु पर्छ मन पवित्र मान्छेको,
पाप गरी मन्दिरमा, धाउनु के अर्थ ?

मरे अब कात्रो, बेरी दिनु तिमी ।
चिताभित्र लास, घेरी दिनु तिमी ।।

बाच्नु मैले यहाँ, कुनै अर्थ छैन,
बाँच्दिन म घाँटी, सेरी दिनु तिमी ।।

सच्चा ब्यक्तित्वको नाउ कहीं छैन
चोखो पिरतीको, गाउ कहीं छैन ।

दिन रात रुन्छु, घरी घरी एक्लै,
बह पोख्ने यहाँ, ठाउँ कहीं छैन ।

खुशी थिए तिमीलाई, दिलभित्र राख्दा
मेरै हौ भनी मैले, देवी देउता भाक्दा

घात पीडा सिवाय अरु के पाए मैले?
सबथोक भुली आज, तिम्रो पछी लाग्दा

आफ्नो भाग्य आफैंले नै लेख्न पाइँदैन
दोश जति अरुतिर फेक्न पाइँदैन

आफ्नो आङमा हात्ती नदेख्ने मान्छेले
अरुको आङमा जुम्रा देख्न पाइँदैन

मेरो छातीभित्र तिम्रो मुटु, फेर्न मन लाग्छ
माया गरी, सधैं अङालोमा, बेर्न मन लाग्छ

मबाट, कहिल्यै पनि तिमी टाढा नहुनु ल
तिमीलाई, सधैं मेरै सामु, हेर्न मन लाग्छ

पराइको, हुन्छौ भन्ने धेरै डर, लाग्छ र नै
मायाको पर्खाल हाली सधै, घेर्न मन लाग्छ

आँसुमा डुब्छ सधैं मनका सबै पाटाहरू
अनयासै फुकाइ दियौ मायाका गाठाहरू

तिमीले साथ छोडेपछि दोधारमा परेको छु
यता कि उता जाऊँ म, धेरै भेटे बाटाहरू

आँसुको भवसागरमा पसे जस्तो लाग्छ
आफ्नै घरमा बनीबास बसे जस्तो लाग्छ

चोट व्यथा पीडा म सहँदैछु जसो तसो
तर मुटुमा तिखो छुरा धसे जस्तो लाग्छ

सत्ता कुर्सीले नेताको ध्यान खिचेकै छ
देशको सम्पति बेकारमा घिचेकै छ

भ्रण्टचार गरी देश रित्तो पारिसके
जन्मदै हामीलाई रिनले थिचेकै छ

कुन नाता जोडुँ मुटुभित्र छुरा धस्नेसँग
मध्यरातबिच अचानक घाँटी कस्नेसँग

अंगालोमा बाँधी सधैं कहाँ बस्न सक्छु र म?
बिशक्त सर्प झैं बनी अनाहक डस्नेसँग

कस्तो रहेछ जिन्दगी, हारेर पनि बाँच्नु पर्ने
कसैको यादमा आसु, झारेर पनि बाँच्नु पर्ने

म जिउँदै छु भन्न पनि शरम लाग्छ मलाई
मनका सारा रहर, मारेर पनि बाँच्नु पर्ने

अभाव भोकमारी ज्यादै बडेको छ अहिले
नेतालाई भयानक भूत चडेको छ अहिले

सुन्दर समुन्त देश बनाउनु त कहाँ हो
कुर्सीकै लागि नेताहरू लडेको छ अहिले