विविध-विधा

पिउनेलाई थाहा छ ! नशाको मात के हो
जिउनेलाई थाहा छ ! दशाको रात के हो
एकपटक पिएर त जीई हेर !!
अनि थाहा हुन्छ मुटुमा लागेको घात के हो ।

बैश छदै तर्किने को, चाहनामा के छ कुन्नि
आज हैन भोलि भन्ने, बहानामा के छ कुन्नि

थालीभरि फूल बोकी, मन्दिरमा देख्छु सधै
मुर्ती ढोगी मिल्ने त्यस्तो, प्रार्थनामा के छ कुन्नि

(१)
तरबार खुडाँ बोकेर हिड्छौँ, खै केको आसमा
पाप र धर्म सँगै नै जान्छ, एकमुठी सासमा
देशको सिमा बारेर तिमी, पर्खाल लगाउँछौ,
मरेर कस्ले के लान्छ भन, त्यो नाङ्गो लासमा

गुम्सिएर सधैंभरि नबस है नारी
आफनै नजरबाट नखस है नारी

एउटीको प्रगतिमा अर्की रमाऔं
व्यर्थको लालचमा नफस है नारी

हजार चोट जस्ले दियो उस्कै यादले पिर्छ किन
बन्द अतित घरिघरि सम्झनाले चिर्छ किन

पत्थर जस्तै कठोर बनाउन खोज्छु मनलाई
जस्तै कठोर मन पनि उनको सामु गिर्छ किन

भित्रभित्रै तिम्ले मलाई मन पराउँछ्यौ रे
सपनीमा मेरै नाम लिई कराउँछ्यौ रे

माया गर्ने मान्छेले त धक फुकाएकै बेस,
आमा बाबुसँग खुबै भन्न डराउँछयौ रे

सृंगार त्यो कस्का लागि गर्या होला ठान्थे,
मेरै नामको सिन्दुर, टिका, चुरा लाउँछ्यौ रे,

तिम्रै हुँ म सधैंभरि तिम्रो कसम खान्छु प्रिय
हाजिर छु म तिम्रो सामू जे जे भन्छौ मान्छु प्रिय

पर-पर नहुनु है मुटु भित्र राखिसकें
उस्तै परे मोहनीले तिमीलाई तान्छु प्रिय