विविध-विधा

खुल्ला देखेँ ढोका, भित्र, पस्न मन लाग्यो
खिस्स हाँसी बस भन्यौ, बस्न मन लाग्यो

थाहा भयो गहिराई, तिम्रो मुस्कानको
जति फस्यो उति उति, फस्न मन लाग्यो

तिम्रो याद धेरै आयो आज आमा
आँखाभरि आँसु छायो आज आमा ।

मरी मेट्थ्यौ भोक भोकै मेरो लागि
ममताले खुशी ल्यायो आज आमा ।

झिरमा उन्नु भन्दा,सासै लगे हुन्छ
बाँच्ने आशा राख्दिन,आशै लगे हुन्छ

मनमा छ खहरे, पानी छैन
जान्थें म बगेर, बानी छैन !

यहाँ मान्छे सबै ढुंगा भए कि
कसैभित्र मायाँको खानी छैन !

छन् फूल यहाँ सबै फुलेका
तर त्यो रातकी रानी छैन !

माया गर्छु भनी दियौ अधिकार अर्कैलाई
झुट्टा कसम जति मलाई, प्यार अर्कैलाई

सपना थियो तिम्रो मेरो सधैं एउटै हुने
टुटाएर सपना दियौ संसार अर्कैलाई

जोवन दाउमा राखी, तिमी आफै हाँसेपछि
मेरो केमा दोस थियो? तिमी आफै टांसेपछि

नेपाली नै बनेको छ दास नेपालीको
यही हो कि परिचय खास नेपालीको

स्वतन्त्र भै बाँच्न पाउनु मौलिक हक हो भन्दै
भर्दा रै’छन् बन्दूकमा सास नेपालीको

बिदेशको दु:ख ब्याथा गजलमा कोर्दछु म
देखेका ती सपनाहरू आफैंभित्र तोड्दै छु म

आफ्नै खेत बाँझो राखी मिठो खाने लालचमा
पराई देशको जंगलमा झारपात गोड्दै छु म

आँशु झारी तिमी जाँदा बाटो हेरें मैले
सोसिँदैथें मेरै सामु, माटो हेरें मैले ।

अन्तिम पल हात चुमी टाढा भएपछि
बसेका ती डामहरू, टाटो हेरें मैले ।

अचेल जमाना खराब छ गर्नु हुन्न भलाई यहाँ
बिगार गर्नेको जमात ठूलो भन्नु कल्लाई यहाँ?

न त भोक टर्छ, न त दु:ख ह,र्छ नारा र जुलुसले
बन्दैन संबिधान टायर बाली सडक गलाई यहाँ

जवानीमा जोश हुन्छ कसो हो त मित्र ?
बियरमा पोश हुन्छ कसो हो त मित्र ?

पिरतीमा जे बोले नि झुटो हुन्न काली
ठुलो ठुलो मौलाएको, बुटो हुन्न काली
विचार गर चोखो माया मनमा हुन्छ हेर,
घाँसको जस्तो बाँध्न मिल्ने मुठो हुन्न काली

फाटेको मन मायाले सिउँला भनेको त,
सँगै बसी चिया कफी पिउँला भनेको त,
मनमा बस्ने मायालु टाढा भयो
साथी नयाँ वर्षको सुभकामना दिउँला भनेको त

कतातिर लागौँ काँडा, दुईटै तिर छ
तल हेर्यो झिर छ, माथि ठाडो भीर छ

बिदेशमै गयो जीवन, घर फर्कौ भने
आफ्नै टाउको माथिको, ऋणको पीर छ

तेल थपी दिने भए, दियो बलिरहन्छ
अन्धकारलाई चिर्न, आफू जलिरहन्छ

त्यसरी नै मान्छेको पनि, साथ दिने भए
सुख-दु:ख यसै नि, जीवन चलिरहन्छ

कहाँबाट आउँछ यो पीर, देख्न पाए हुन्थ्यो
संधैलाई नआउने गरी, छेक्न पाए हुन्थ्यो

दुखैमा बाच्छौ भने बाचि देउ के छ र ?
सुन्दर जिबन लौ भाची देउ के छ र ?

पिडा तिमीलाई चाहिन्छ भने संगाल
खुशी अर्को जुनिलाइ साचिदेउ के छ र ?

खरानी नै बन्नु छ भने मै बनी दिन्छु
भाग्यमानी बनी हासिदेउ के छ र ?

दु:खमा साथ दिन्छु मेरै गल्ती हो भने
काख दिनेलाई मासिदेउ के छ र ?

मेरो साथ आसु झार्ने पल भएपछी
जवानी अन्तै तिर गासिदेउ के छ र ?

सम्झना ताजा राख्दा गहारो पर्छ भने
मन बाट टाढा भासिदेउ के छ र ?

माया दियौ साथ दियौ प्रशंसा गरौं कसरी
फराकिलो प्रेमको खाडल म भरौं कसरी ।।

यति धेरै प्रेमको मुल्य कसैले सोध्यो भने
धमिलो यो जीवनको भेल म तरौं कसरी ।।