विविध-विधा

१) हिमालदेखि

हिमालदेखि तराइसम्म
हेर सुन फल्छ लटरम्म
विकासमा हामी लाग्नै पर्छ
कोही बस्ना हुन्न गजधम्म

बुरी नजरका प्यालाहरूबाट बचाउनु
आफूलाई ती भवँराहरूबाट बचाउनु

बाँकी लामो छ अँझै जीवनको यात्रा
सुकोमल पाउ काँडाहरुबाट बचाउनु

दीन दुःखीको सारथी बन्छ, रविलाई देश निकाला गर
वेचियका चेलीको उद्दार गर्छ, रविलाई देश निकाला गर

घरमा पनि छट्पट् छट्पट् गर्ने, सुत्ने खानेको टुङ्गो छैन,
तस्करीको अड्डा खोजी गार्यो, रविलाई देश निकाला गर

पहिले पाप पछि भगवान क्या गजब छ
पहिले सम्मान पछि बदनाम क्या गजब छ

गर्नेले गर्छ नगर्नेले हेर्छ यो समाजमा
गर्नेलाई होइन नगर्नेलाई सम्मान क्या गजब छ

तिम्रो जस्तै मेरो पनि छातीभरि व्यथा छ
नभन्नु निष्ठुरी मलाई मेरो आफ्नै कथा छ

सात समुद्र नौ डाँडाले छेक्न सक्दैन ती
मुस्कान भरिएको अनुहार जता – तता छ

बेकार सङ्का गर्छ्न् पति, बिदेशमा बसेर
बुझ्दैनन्! सम्झाउँछु कति, बिदेशमा बसेर

जे छ खाउँला सँगैसँगै रमाउँला भन्दा नि
उतै खर्च गर्छ्न भए जति, बिदेशमा बसेर

अहो ! भन्छन् नयाँ नेपाल हो रे– लोकतन्त्र उस्तै तर
पीडा, जलन, कुकर्म भ्रष्टता शोकतन्त्र उस्तै तर

हिजो मोडिन्थे गोडा राजाज्यूका आज सयौँ नेताका
नयाँ रे नि खै के हो मखुण्डोको ढोगतन्त्र उस्तै तर

कोही जित्छन् कोही हार्छन् हारजित यस्तै छ
धनीलाई सुुखसयल गरीबको गीत यस्तै छ

नरोएको रात छैन नखोजेको बास छैन्
दुनिया सारा बदलियो तर हित यस्तै छ

कतिकति आउँछन् र आएर जान्छन्
हज्जारौं सपनाहरू देखाएर जान्छन्

दोबाटोको ठाँटी भएँ दुनियाँको सामु
यौवनका भारीहरू बिसाएर जान्छन्

एक्लै हुन्छु एकान्तमा तिम्रै तस्वीर छुन्छु आमा,
पोल्छ छाती तिम्रो यादले बर्बराउदै रुन्छु आमा

किन गयौ एक्लै छोडी यो संसारमा मलाई,
हेप्छन यो दुनियाले अनि एक्लो हुन्छु आमा

अज्ञानको छ निद्रा निद्रा टुटाउने छन्
हाम्रै युवाहरुले यो देश उठाउने छन्

धेरै भयौं पछौटे भन्दै अगाडि आई
हज्जार पाखुराले बाँझो फुटाउने छन्

संसार तिम्रै रचना छ तिम्रै
माया छ तिम्रै रटना छ तिम्रै

तिम्रो छ धाता महिमा अपार
सम्भार तिम्रै ढकना छ तिम्रै

पछुताउनु बाहेक अरु कुनै विकल्प छैन
तिम्रो याद को हुरी मोड्न सकेको छैन
बिदाइ त गरे केही फरक नपरे जस्तो गरी
प्यालामा प्याला थप्नुको विकल्प छैन

अरुण तमोर सप्तकोशी सुक्दैछ आमा
अटल अमर सगरमाथा झुक्दैछ आमा

नरपिचास कुलंघार देशद्रोहीले गर्दा आज
नेपाल र नेपालीको सपना टुट्दैछ आमा

मलाई यी कुराहरूको डर नलागोस्
तिमीलाई कसैको नि नजर नलागोस्

बदलिन्छ समय बदलिन्छन् मौसम
नबदलियोस् मनमा असर नलागोस्

एक शब्दले प्रेमको गाँठो झन् कसिएको हुनुपर्छ।
जस्को गुनगान भो, उसैसँग नजिकिएको हुनुपर्छ।

सोचेझैं परिवर्तन हरक्षण हरपल नभएपछि
चाहेको सारा प्रयासहरू सफलनै नभए पछि
अपन्याउछन् भ्रष्टाचारको बाटो हाम्रो देशमा
सबैको मन पवित्र अनि सुन्दर नभएपछि

१) कोही भन्छन्

कोही भन्छन् बुढोरुख ढल्ने भयो
कोही भन्छन् अमृतफल फल्ने भयो
कस्का भाषण पत्याउने जनता भए अलमल्ल
जस्ले धेरै भोट ल्याउँछ उस्ले अवीर दल्ने भयो

समाजमा उसलाई नाम दिनु पर्छ
बगाउँछ पसिना है काम दिनु पर्छ

बेरोजगारी धेरै भो मेरो मुलुकमा
युवालाई हैन भने दाम दिनु पर्छ

विदेश गएर मोज मस्ती गर्न थालेछु
साथीभाइ सबैलाई बिर्सन थालेछु
चार पैसा जाबो कमाउँदैछु भन्दैमा
म त आजकल औकात देखाउन थालेछु।१।