विविध-विधा

पल्लो घरे साईलीले मेरो घर फोरी अस्ती
ए ! लाहुरे दाई, डर लाग्छ जाऊन गस्ती ।

माया लाग्यो घरमा राखे, सवै काम गर्थी
मौका छोपी लुटेर अहिले गर्दै छे रे मस्ती ।

मेरो त सर्वस्व हर्योर, केही छैन बाँकी
सम्पतीको नाऊमा बाँकी छ एउटा किस्ती ।

मेरो त अँधकार भयो, घरआँगन दाई
ऊ हेर्नुस् त झिलिमिली छ उसको बस्ती ।

जिस्काई सबको सामु परेली, सन्काउने मन छ
फकाउदै फेरि हाम्रो माया, तन्काउने मन छ

तिमीलाई देख्दा आज यहाँ, बिर्सेको कथा फेरि याद आयो
निको भैसकेको घाउ सबै, कोट्टिएर ब्यथा फेरि याद आयो

न आऊ तिमी फेरि यहाँ, भन्ने मेरो मतलव होइन
बन्द भएको इतिहाँस यहाँ, किताब खुली फेरि याद आयो

सही र गलतको बार्ता होइन, तर्क गरेर नै के हुन्छ
बिर्सिसकेका सम्झनाहरू, फर्की आउँदा फेरि याद आयो

आफ्नै गाउ राम्रो हुन्छ शहरको कुरा नगर
सिच्न भूमि कुलो काफी नहरको कुरा नगर

क्षतविक्षत पार्न मुटु किन चाहियो तरबार
एउटै घात काफी हुन्छ कहरको कुरा नगर

माया गर्छु भन्ने हिम्मत जुटाउन सकिन
दैबले कोरेको किस्मत फूटाउन सकिन
दोबाटोमा एक्लै मलाई छोडेर गएपछि
तिम्रै यादमा पिउने आदत छुटाउन सकिन

तिम्रो झुटो प्रेमले पोलेर पो रुँदै बसेँ
सपनीमा तिम्रै तस्वीर बोलेर पो रुँदै बसेँ

अँझै प्रेमका चोटहरूमा खाटा बस्न पाएनन् है
घाउभरी नून चुक मोलेर पो रुँदै बसें

हाम्रो प्रेम संसार सामु गोप्य राख्ने भन्थ्यौ तिमी
प्रेमको पीडा सबै सामु खोलेर पो रुँदै बसेँ

बाधा अनि अर्चन हुन्छ मायामा
ख़ुशी अनि तर्पन हुन्छ मायामा
प्राप्ति मात्र पनी हैन रहेछ माया
त्याग अनि अर्पन हुन्छ मायामा

मुक्तक
मकर वियस
पहिला पहिला लाग्थ्यो जूनको माया,
सदावहार लागिरह्यो खुनको माया,
मनसँग मनको नाता गासिएछ सायद,
हिजोआज लाग्न थाल्यो उनको माया,
सर्लाही, हालःहेटौंडा
www.makaronline.blogspot.com

उसले फेरि आज बत्ती जलाएर गयो,
थाकेको बेला फेरि आज गलाएर गयो ।

बिर्सदैथे ती खतहरू पुराना चोटका,
आयो कोट्यायो अनि चलाएर गयो ।

बल्लतल्ल विश्वासले उभ्याएथे आफैलाई,
आयो घात गर्यो अनि ढलाएर गयो ।

कल्पनामा पिरतीको, दीप बल्छ भित्र भित्रै
अरुसँग बोल्छौ हाँस्छौ, मुटु जल्छ भित्र भित्रै

स्वास बनी चल्नु सधैं, धड्कनको मझेरीमा
एकै पल टाढा हुँदा, आँत गल्छ भित्र भित्रै

होटेलमा साँप्रा टोक्दै संविधान बनाउने कुरा जस्तो
एकदुई पेग लगाएपछि त योजना सितन कुखुरा जस्तो

ती नै नेता र पछ्यौटेहरू मेची महाकाली चुसिरहने
नेपालीको पसिना र अवसर काट्ने धारिलो छुरा जस्तो

रदिफ काफियाको संयोजन हुनुपर्छ गजलमा
तखल्लुसको विचार जनमा छुनुपर्छ गजलमा

रति बोक्ने गजलको धर्म हो माया प्रीतको
अन्तरमनका कथा व्यथा धुनुपर्छ गजलमा

तिमीसँगै हराएका पल खोज्दै छु म
तेतै आउन ठेल्नलाई गल खोज्दै छु म

हराई गए अमन चैन शान्ति हराई गयो
मन माझ शान्ति ल्याउने जल खोज्दै छु म

हासो, आशु बाटौला सँगै
पीर, बेथा साटौला सँगै
नमरी बाचे कालले साँचे
सुख, दुःख काटौला सँगै