विविध-विधा

तिम्ले मैले पुज्ने देउता फरक जस्तो गर्छौ किन
सानो जातले छोयो भन्दै सुनपानI छर्छौ किन ।

दिन मिल्ने भए माग्थे ठुलो जात प्रभूसँग
मेरै भाग्य कमजोर रैछ मलाई आँखा तर्छौ किन ।

आज पनि सम्झनामा टोलाएछु रातैभरि
बर्बराउँदै सपनामा बोलाएछु रातैभरि ।

तिमी छौ र यो ढुक ढुकी चलेको छ हेर
तिम्रो माया कल्पनामा तोलाएछु रातैभरि।

मान्छेहरू भन्नु यहाँ के रैछन बुझ्दै छु ।
मलाई बिगार्ने चाहिँ यहाँ मेरै छन बुझ्दै छु ।
आफै गर्नु पर्ने काम सल्लाह माग भर नपर;
अर्काको राम्रो नदेख्ने यहाँ धेरै छन बुझ्दै छु ।

तिमी हिड्ने बाटो मैले चिन्न सकिन ।
तिम्रो महँगो माया किन किन्न सकिन ।

(१)
भगवान थेत्तरो छ सबै कुरा बुझ्दैन
भगवान बहिरो छ केही पनि सुन्दैन
त्यही भगवान गतिलो छ भन्छौ तिमी
त्यही भगवान भगवानलाई पुज्दैन

दिगो शान्ति र संबिधान खोजिरहेछ देशले
निरन्तर् बिकासका अभियान खोजिरहेछ देशले

सधैँ अरुको गुलामी र चाकडी मात्र होइन
स्वतन्त्रता र आत्मसम्मान खोजिरहेछ देशले

फेरि पनि उही बाटो आउँछ्यौ कि भनी
अबेरसम्म पर्खिएँ तारा गनी-गनी

मुस्कानमा गुराँसको लाली फिजाउँदै
आकाशमा बोलाउँथी मलाई चाँदनी

निश्चल चोखो प्रीति छोडी जात फालिदियौ
कोल्टे बदल्ने अनिद्राको रात पालिदियौ ।

प्रेमालापमा डुबुल्कीको रहर जाग्यो आज ।
कल्पनाको अंकमालमै प्रहर भाग्यो आज ।

आँचल खोली मुहारको दर्शन गर्ने मन
तारिफका पूल नबाँध्दै कहर दाग्यो आज ।

झिसमिसे अंधेरीमा गाँउ डुल्ने धोको
झिलिमिली रुमलाईमा शहर माग्यो आज ।

सपनीको तिर्सनालाई बिपनीमा पिउन
प्यासी उही ‘कुमार’लाई जहर लाग्यो आज ।

रहस्यको आँखीझ्याल नखुलेको धेरै भयो ।
जोडी परेवा निस्फिक्री नडुलेको धेरै भयो ।

अनायासै गोरेटोमा मात दिने धेरै भए ।
मदिराको साहारामा नझुलेको धेरै भयो ।

सदा उजाड मरुभुमी सिंन्चित हुनु कहाँ ?
सुनाखरी पारिजात नफुलेको धेरै भयो ।

ठन्डियाम र एक्लोपनमा दुरी झनै बढी ।
स्वर्गीय न्यानो अंगालो नभुलेको धेरै भयो ।

लुकिछिपी निष्ठूरीलाई हेरिन्न है अब
सदाचारका नियमहरू टेरिन्न है अब ।

क्षणिक नजर एकै सही कोण मिलाई ठाउँमा
दोबाटा र चौबाटाहरू फेरिन्न है अब ।