विविध-विधा

पिउँदिन भन्दा भन्दै अलिकति पिलाई दियौ
थपुँ थपुँ लाग्ने गरी यस्मा यो के मिलाई दियौ

खै समयले कस्तो हुरी लिएर आयो।
टाढिनु पर्ने मज’बुरी लिएर आयो।।

अनायसै प्रेम फाट्दाखेरि सानु
हाम्रो अविश्वासको धुरी लिएर आयो।।

आज पनि तिम्रो फोटो हेरी रात काटेँ
सम्झनामा शिरानी त्यो बेरी रात काटेँ ।

सपनामा आयौ तिमीसँग रमाउन
तिम्रो न्यानो भेट्न कोल्टे फेरि रात काटेँ ।

१)
हेर्न त हेर्यो जूनले, खै कस्लाई हेर्यो थाहा छैन
फिँजाएर किरण उस्ले, खै कस्लाई बेर्यो थाहा छैन
हरेक साँझ हेर्छु म, बोलाउने नि गर्छु उस्लाई
निशब्द भै टोलाउछिन, खै कस्लाई टेर्यो थाहा छैन ।

(१)
धेरै छन् पीरव्यथा, बुझ्न बुझाउन गाह्रो छ
हुन्न कहिल्यै सोचे जस्तो, खै ! के तगारो छ ?
एक्लो मन एक्लो ज्यान यो मोरो ‘काले’लाई,
मानवलोक भन्दा त, मसानघाट प्यारो छ ।

आजभोलि हल्ला सुन्छु जीवनसाथी खोज्दै छौ रे
मभन्दा नि अझै राम्रो अरुलाई नै रोज्दै छौ रे ।

मेरो मुटु तिमी भन्दै सर्बस्व नै सुम्पिदिँदा
उजाड पारी संसार मेरै अझै के के सोच्दै छौ रे ।

कहिले शहरमा डुलायौ मलाई
कहिले बगरमा भुलायौ मलाई ।

मोहनी लगायौ प्यासी बनायौ
प्रेमकै जहरमा झुलायौ मलाई ।

के पिउनु जब एक्लै तिम्रो साथ हुन्न
नशा त्यो नशा होइन जसमा मात हुन्न

सुनसान छ मौसम त्यहाँ हामी दुई
के मज्जा भो पिउनुको जब रात हुन्न

सुगन्धित पुष्प खोज्छौ कोपिला नै झारेपछि
के अर्थ भो फूल छरी हिड्ने बाटै बारेपछि

यो जुनिमा तिम्रै हुँ म भन्थ्यौ शिरमा हात राखी
व्यर्थ भयो कसम खाको आज एक्लै पारेपछि

मुटु माग्यौ बस्नलाई दिएँ जाना-जानी
धुजा धुजा भयो मुटु सिएँ जाना-जानी ।

मेरो चोखो मायालाई स्वार्थि नाम दियौ
दुखे अनि एकान्तमा खिएँ जाना-जानी ।