पुरानो सम्झना
घुम्टो ओडी सजिएर बेहुली भाको दिन
चोरी दाउले तिमीलाई हेर्थें छिन छिन
बेहुलो बनि गम्कियेर तिम्रो छेउ बस्दा
एकै चोटी दुनियाको नजर आई खस्दा
रातो पिरो तीतो टर्रो सबै भाको दिन
चोरी दाउले तिमीलाई हेर्थें छिन छिन
त्यो क्षणको रुप तिम्रो अनि माधुर्यता
अहा कति सुखद थियो तिम्रो समिपता
दुवै मिली मण्डपमा हामी घुम्या दिन
चोरी दाउले तिमीलाई हेर्थें छिन छिन
अन्माएर तिमीलाई रात साँझ गरी
ल्याउँदा पनि तिमीलाई हेर्थें घरी घरी
थाहै नपाई तेईस बर्ष पुरा भए दिन
चोरी दाउले अझै पनि हेर्छु छिन छिन
देवीचरण भण्डारी “सरोज”