मुक्तक १
-म भुइंचालो पिएर बाँचिरहेछु
-मुटुको चिरा सिएर बाँचिरहेछु
मैले मेरै हत्केलाहरूमा उठाउनु पर्नेछ -नयाँ धरहरा :
हो, म यै अठोट लिएर बाँचिरहेछु
मुक्तक २
अब यो गाउँमा दोहोरी गाउने को होला ?
छहरोसित मितेरी लाउने को होला ?
सबै जना कुम्लो कुटुरो बोक्दै तल झरेपछि –
उकालोमा छाता ओढी आउने को होला ?
मुक्तक ३
तिमी बिना यो लामो बाटो काट्ने कसरी ?
मायाको दोहोरो डोरी अब बाट्ने कसरी ?
तिमी थियौ र दु:खसित सुख साट्थें म –
अब सधैं दु:खसित दु:खै मैले साट्ने कसरी ?