बिहानी उषामा हिमालै खुलेको ।।
पखेरी ढपक्कै चिमालै फुलेको ।।
फुलेरै चमेली खुलेको बगैँचा,
सुगन्धी हवामा भमारा भुलेको
वसन्ती छटामा उडेको चरी झैँ,
बगैचा सुनौलो छ जोडी डुलेको ।।
छ खेती बटुल्नै जुटेको किसान,
फलेको खिलेर छ धानै झुलेको ।।
छ पिर्ती बसेको जवानी चढेर,
रसिलो छ मायाँ खुशीले घुलेको ।।
मुफरद बहर
(बहरे मुतकारिब मुसम्मन सालिम अर्कान) मा आधारित अर्थात (भुजङ्ग प्रयात छन्द)
सुत्रः- फऊलु x ४ अक्षर १२