यो सपनीको रात थियो

छामछुम गरे सिरानीमा आँशु मात्र हात लाग्यो
सोधपुछ गरे छिमेकीमा उल्टै मलाई बात लाग्यो

मुटु फुट्दा सानो टुक्रा चुडिएर गएको थियो
रोक्दै थिए चिच्चाएर हास्दै ऊसको साथ लाग्यो

सुन्नेहरू सुनिरहे रोदनका आवाजहरू
खुच्चिङ्ग गर्दै हेर्ने भीडको झिस्मिसेमा तात लाग्यो

रगतको आहालमा अचेत भई सुन्दै थिए
भन्दै थिए भीडबाट ‘यस्लाई प्रेमको मात लाग्यो’

होस खुल्दा एक्लै थिए पसिनाको भल थियो
आफ्नै मनले भन्दै थियो यो सपनीको रात थियो