नेपाली हुनमा

सगरमाथाको देश मेरो लालीगुराँस फुल्दछ
बयेली खेल्दै तराई फाँटमा धानबाला झुल्दछ

नौरङ्गी डाँफे रमाउदै हेर्छ मयुर नाँचेको
कोईली गाउँछे पहाडी भाका हिमाल हाँसेको

छङछङ गर्दै झर्दछन् झर्ना संगीत धुनमा
गर्व र खुशी दुवै छ मलाई नेपाली हुनमा

मेची र काली गण्डकी कोशी बग्दछन् सुसाई
न जाडो भन्छन् न गर्मी भन्छन् न बस्छन् बिसाई

अमृत समान महत्व यिन्को छ थोपाथोपामा
गर्व र खुशी दुवै छ मलाई नेपाली हुनमा

पुर्खाको नासो न बनोस् पासो होस् गरौँ सबैले
यो देशभन्दा ठूलो हुँ भन्ने नसोचौँ कसैले

धर्तीको स्वर्ग यै देशमा छ बनाउन सकेमा
गर्व र खुशी दुवै छ मलाई नेपाली हुनमा

(राष्ट्रभक्ति गीत)