छातीभित्र मुटु रुन्छ

छातीभित्र मुटु रुन्छ बाहिर भने हांसेको छु
आफ्नै मनको दुनियामा वैरीभई बांचेको छु ।

शुन्यतामा उडे सपना सिमलको भुवासरी
व्यथाहरु विनास्वरै अलापेर बसुं कति ?
आफ्नै आकाश चिथोरेर सपनाहरु सांचेको छु
छातीभित्र पहाड बोकी बादल बनी उडेको छु ।
छातीभित्र मुटु …………………

सपनीमा रोपेको फूल मनैभित्र ओइलाई झर्यो
जहां जाउ आज मलाई आफ्नै सासले पोल्न थाल्यो ।
चुंडिएको जीवनरेखा आज फेरि गांसेको छु
ओइलाएको फूलमाथि शीत बनी बर्षेको छु ।
छातीभित्र मुटु …………………