चुनाव आउँदा घर-गाउँमा राजनीति तुफान चल्छ
घोषणा पत्र एजेण्डामा देश निर्माणको बखान चल्छ
नारा जुलुस घन्काउँछन् गाउँ बस्ती चोकचोकमा
पार्टी बीचमा होडबाजी र प्रचारबाजी उठान चल्छ
झुक्याउनलाई दौडधुप गरीबका ती झुपडीमा
झुटा सिध्दान्तका चिप्ला भाषण रटान चल्छ
सत्ता भत्ता कुर्ची खेलमा बिगत त्यसै खेर फाली
खै त क्रान्ति ? त्यही सोधखोजको विधान चल्छ
इमानमा चल्न सके पाउँछन विश्वास जनताको
हारजित कस्को भन्दै अभिमतको किटान चल्छ
कल्पना पौडेल ‘जिज्ञासु”
खजुरा बाँके