बाढी पसेको सहर जस्तो मेरो बस्तीमा
छानो खसेको घर जस्तो मेरो बस्तीमा ।
भागबण्डामै भिडेका छन् सरदारहरू
निशाचरको डगर जस्तो मेरो बस्तीमा ।
जगभित्ता भत्काउने अभियान मात्रै चल्छ घरिघरि
सुनामीले उरालेको लहर जस्तो मेरो बस्तीमा ।
अभाव अनिकालकै रेला चल्छ सधैँभरि
नार्मदमा पलाएको रहर जस्तो मेरो बस्तीमा ।
मुटु हैन लोहोरा फलेका छन मान्छेभित्र
सुख्खा खोलाको बगर जस्तो मेरो बस्तीमा ।
उत्पीडनका नीलडाम मात्र देख्छु अनुहारमा
बाधा जीवनको कहर जस्तो मेरो बस्तीमा ।
मुर्कट्टा नाच मात्रै चल्छ सत्ताका मसानघाटहरूमा
अँधेरी रातको तेस्रो प्रहर जस्तो मेरो बस्तीमा ।